“Azərbaycanın coğrafi mövqeyi bizə beynəlxalq yükdaşımalarda əhəmiyyətli yer tutmaq imkanı verir. Türkiyə, Rusiya və İrana daşımalarda Azərbaycan daşıyıcıların üstünlük qazanması logistika sahəsinin ölkə iqtisadiyyatının inkişafına getdikcə daha çox töhfə verdiyini və iqtisadiyyatda əhəmiyyətli yer tutduğunu göstərir”

Marja xəbər verir ki, bunu “Shark Logistics” şirkətinin direktoru Amid İbadov deyib.

Şirkət rəhbəri Azərbaycana və Azərbaycandan daşımalardan başqa, “Shark Logistics” də daxil olmaqla, logistika şirkətlərinin tranzit yüklərin daşınmasında rolunun artdığını bildirib və bir neçə gün əvvəl Çindən gələn yükləri üçüncü ölkəyə daşıdıqlarını vurğulayıb.

“Amma təəssüf ki, Avropaya yükdaşımalarda Azərbaycan şirkətlərinin payı hələ də çox azdır. Bizim məqsədimiz ölkəmizin üzərindən daşımaların öz iqtisadiyyatımıza gəlir gətirməsinə və öz daşıyıcılarımızın böyük pay almasına nail olmaqdır”, - logistika şirkətinin rəhbəri qeyd edib.

“Hazırda ölkənin ən iri distribüter şirkətlərinə xidmət göstərən, qida və qeyri-qida məhsullarının daşımasında ixtisaslaşan “Shark Logistics” Azərbaycandan daşımalar etdiyi Türkiyə, Rusiya, Gürcüstan, Belarus, Monqolustan kimi ölkələrdən bir-birinə və üçüncü ölkələrə də yüklərin çatdırılmasını həyata keçirir”, - Amid İbadov deyib.

Yükdaşımaların iqtisadiyyatda rolunun artdığını nəzərə alaraq şirkət həm avtomobil portfelini genişləndirmək, avtomobilləri, daşınan yüklərin keyfiyyətini izləmək üçün innovativ texnologiyaların tətbiqini artırmaq, müştərilərə yüklərin daşınması üçün daha yaxşı həllər təklif etmək, sürücülərin peşəkarlığını yüksəltmək istiqamətində də yeniliklər edir. Hal-hazırda 150-yə yaxın TIR modeli avtomobilinə malik şirkət TIR parkının yerləşdiyi Ərkivan qəsəbəsində (Masallı rayonu) sürücülərin təlimini də dəstəkləyir. Şirkətin qarşısında duran əsas hədəflərdən biri də Avropa ölkələrinə daşımalar etmək üçün bu ölkələrə giriş vizası olan peşəkar sürücülərin sayını artırmaqdır.

Qeyd edək ki, “Shark Logistics” 2014-cü ildən fəaliyyətdədir.