"Bank BTB" ASC 2024-cü ilin 9 ayı üzrə (yanvar-sentyabr) maliyyə göstəricilərini açıqlayıb. Bankın gəlirləri və əməliyyat mənfəətində artım baş verib.

Marja.az xəbər verir ki, 2024-cü ilin 9 ayı ərzində "Bank BTB"ın cəmi əməliyyat gəlirləri (faiz və qeyri-faiz gəlirləri) 27 milyon 557 min manat, cəmi əməliyyat xərcləri (faiz və qeyri-faiz xərcləri) 23 milyon 795 min manat, gəlirlər xərcləri üstələdiyindən əməliyyat mənfəəti 3 milyon 762 min manat təşkil edib. Bank əməliyyat mənfəətindən 376 min manat aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırıb. Nəticədə, cari ilin 9 ayında "Bank BTB" 3 milyon 386 min manat mənfəət əldə edib (gözlənilməz fəaliyyət növlərindən və əvvəlki dövr üçün uçotdakı dəyişikliklərdən xərc (3 milyon 880 min manat) nəzərə alınmadan).

Müqayisə üçün qeyd edək ki, 2024-cü ilin 9 ayı ərzində "Bank BTB"ın cəmi əməliyyat gəlirləri 25 milyon 885 min manat, cəmi əməliyyat xərcləri 23 milyon 990 min manat, əməliyyat mənfəəti 1 milyon 895 min manat təşkil etmişdi. Beləliklə, 2023-cü ilin 9 ayı ilə müqayisədə 2024-cü ilin 9 ayı ərzində "Bank BTB"nin əməliyyat mənfəəti 2 dəfə artıb.

2024-cü ilin 9 ayı ərzində "Bank BTB"nin faiz gəlirləri 845 min manat və ya 3,8%, qeyri-faiz gəlirləri isə 827 min manat və ya 24% artıb.

30 sentyabr 2024-cü il tarixində "Bank BTB" 368 milyon 238 min manat cəmi aktivlərə, o cümlədən 275 miylon 192 min manat kredit portfelinə (müştərilərə verilmiş kreditlər) malik olub. Bank ötən ilin sonunda 376 milyon 759 min manat cəmi aktivlərə, o cümlədən 276 milyon 855 min manat kredit portfelinə malik idi. 

30 sentyabr 2024-cü il tarixində "Bank BTB" 51 milyon 654  min manat məcmu kapitala malik olub, bu da Mərkəzi Bankın minimum tələbindən (50 milyon manat) yüksəkdir. Cari il ərzində "Bank BTB” nizamnamə kapitalını yeni emissiya hesabına 5 milyon manat artırıb.