15 noyabr 2024-cü il tarixində "Bank Respublika" ASC səhmdarlarının növbədənkənar ümumi yığıncağı keçiriləcək. 

Marja.az xəbər verir ki, gündəlikdəki məsələlər aşağıdakılardır:

1. İclasın sədrinin və katibinin təyin edilməsi.

2. İclasın gündəliyinin təsdiq edilməsi.

3. "Bank Respublika" ASC-nin törəmə təsərrüfat cəmiyyətinin gələcək fəaliyyəti ilə bağlı qərarın verilməsi haqqında. 

Yığıncaq  Xaqani  küçəsi, 21 ünvanında yerləşən bankın Baş ofisində keçiriləcək.

Qeyd edək ki, "Bank Respublika" ASC-nin yeganə törəmə müəssisəsi "Bakı Sığorta" ASC-dir.

Xəbər verdiyimiz kimi, 18 noyabr 2024-cü il tarixində "Bakı Sığorta" ASC-nin Baş ofisində cəmiyyətin səhmdarlarının növbədənkənar ümumi yığıncağı keçiriləcəkdir.

Şirkətin məlumatında bildirilir ki, iclasın gündəliyi, əlavə məlumat, o cümlədən yığıncağının gündəliyi üzrə materiallarla tanış olmaq üçün "Bakı Sığorta" ASC-yə (Bakı şəhəri, Nəsimi rayonu, Azadlıq prospekti, 120 ünvanında yerləşən inzibati binanın 6-cı mərtəbəsində) həmçinin 969 telefon nömrəsi vasitəsilə müraciət edilə bilər.

Avqust ayının sonunda Şirkət yaydığı məlumatında bildirmişdi ki, 10 oktyabr 2024-cü il tarixində "Bakı Sığorta" ASC-nin Baş ofisində cəmiyyətin səhmdarlarının növbədənkənar ümumi yığıncağı keçiriləcəkdir.

Qeyd edək ki, bir nüçə gün öncə Azərbaycan Mərkəzi Bankı (AMB) "Bakı Sığorta" ASC-nin lisenziyasının qüvvəsini məhdudlaşdırıb. “Sığorta fəaliyyəti haqqında” qanunun 105.1.1-ci maddəsinə müvafiq olaraq, şirkətin könüllü müraciəti əsasında “Avtonəqliyyat vasitəsi sahiblərinin mülki məsuliyyətinin icbari sığortası”, “Daşınmaz əmlakın icbari sığortası” və “Daşınmaz əmlakın istismarı ilə bağlı mülki məsuliyyətin icbari sığortası” növlərinə verilmiş icazələrin ləğv edilməsi yolu ilə lisenziyasının qüvvəsi məhdudlaşdırılıb. Həmçinin, “Bakı Sığorta” Açıq Səhmdar Cəmiyyətinin (“Bakı Sığorta” ASC) İcbari Sığorta Bürosu Hüquqi Şəxslərin İttifaqında (Büro) iştirakına xitam verilmiş və şirkət Büronun iştirakçı sığortaçılarının reyestrindən çıxarılmışdır.

2024-cü ilin yay ayında “Bakı Sığorta” ASC-nin İdarə Heyətinin sədri Ramin Məmmədov vəzifəsini tərk edib.

Bu il "Bakı Sığorta" ASC-nin səhmdarı olan 2 fiziki şəxs (Behbud Nəcəfov (6,93%), Murad Rəhimov (6,97%)) öz paylarını “Bank Respublika” ASC-yə ötürüblər. "Bakı Sığorta"nın yarımillik hesabatında verilən məlumata görə, nəticədə “Bank Respublika” ASC-nin sığorta şirkətinin nizamnamə kapitalındakı payı 93,32%-ə yüksəlib.  "Bakı Sığorta" ASC-nin nizamnamə kapitalının 6,68%-i "Ekolizinq” MMC -yə məxsusdur.

Bundan əvvəl avtomobil satışı ilə məşğul olan "Dimond Motors" MMC, "Yeni Motor" MMC və "Toyota Abşeron Mərkəzi" MMC "Bakı Sığorta" ASC-dəki paylarını satmışdılar.