ABB (Azərbaycan Beynəlxalq Bankı) 2024-cü ilin 9 ayını (yanvar-sentyabr) 235 milyon 85 min manat xalis mənfəətlə başa vurub.

Marja.az xəbər verir ki, 2024-cü ilin 9 ayı ərzində ABB-nin cəmi əməliyyat gəlirləri (faiz və qeyri-faiz gəlirləri) 896 milyon 260 min manat təşkil edib. Bu da ötən ilin müvafiq dövrü ilə müqayisədə 21.1% və ya 156 milyon 170 min manat çoxdur.

Hesabat dövrü ərzində ABB-nin mümkün zərərlər üçün yaradılan ehtiyatlara ayırdığı vəsait 88 milyon 640 manat olub. Həmçinin Bank tərəfindən əməliyyat mənfəətindən 54 milyon 254 min manat mənfəət vergisi hesablanıb.

BANKIN KREDİT PORTFELİ BÖYÜYÜB

ABB-nin kredit portfeli (müştərilərə verilmiş kreditlər) 2023-ci ilin sonu ilə müqayisədə 20,58% və ya 1 milyard 39 milyon 70 min manat artaraq 6 milyard 87 milyon 833 min manata çatıb. 2024-cü ilin 9 ayında, ötən ilin sonu ilə müqayisədə biznes kreditləri üzrə portfel 437 milyon 167 min manat artaraq 2 milyard 941 milyon 782 min manata yüksəlib.

MƏCMU KAPİTALI 1,6 MİLYARD MANAT OLUB

30 sentyabr 2024-cü il tarixində "ABB" ASC 1 milyard 627 milyon 961 min manat məcmu kapitala malik olub. III-cü rüb sonunda ABB-nin I dərəcəli kapitalının adekvatlıq əmsalı 16.70%, məcmu kapitalının adekvatlıq əmsalı isə 19.35% təşkil edib. Bu göstəricilər tənzimləyici orqanın müəyyən etdiyi normalardan (müvafiq olaraq sistem əhəmiyyətli banklar üçün minimum 6% və 12%) əhəmiyyətli şəkildə yüksəkdir.

BANK TƏRƏFİNDƏN YENi SƏHM BURAXILIŞI

"ABB" ASC səhmlərinin ilkin kütləvi təklif (IPO) üsulu ilə yerləşdirilməsi tamamlandıqdan sonra özəl sektorun Bankdakı payı 7.8%-ə yüksəlib. ABB səhmlərinə 33 mindən çox investor 50 min ədədə yaxın sifariş yerləşdirib və bütün sifarişlər icra olunub. Beləliklə, ABB-nin səhmdarlarının sayı 1794 nəfərdən 35 105 nəfərə qədər artıb. Səhmlərin ümumilikdə reallaşan həcmi 56.53 milyon manat təşkil edib.

30 sentyabr 2024-cü il tarixində ABB-nin cəmi aktivləri 13 milyard 436 milyon 626 min manat, öhdəlikləri isə 11 milyard 549 milyon 831 min manat təşkil edib.