2024-cü ilin İyun ayının nəticələrinə əsasən, "PAŞA Bank" ASC-nin korporativ kreditləşmə üzrə bazar payı 20.4% təşkil edib.

Marja.az xəbər verir ki, bunu keçirilən mətbuat konfransında PAŞA Bankın İdarə Heyətinin üzvü, Baş Maliyyə inzibatçısı Murad Süleymanov bildirib.

O qeyd edib ki, ölkə üzrə 13 milyard 875 milyon manatlıq korporativ kreditləşmənin 2 milyard 826 milyon manatı PAŞA Bank tərəfindən təqdim olunub.

30 iyun 2023-cü il tarixində PAŞA Bankın korporativ kreditləşmə üzrə bazar payı 20,5% idi.

2024-cü ilin iyul ayının nəticələrinə əsasən isə Bankın bazar payı 20.3%-ə düşüb.

Müqayisə olunan dövrdə cəmi korporativ kreditləşmə bazarı 2 milyard 224 milyon manat, PAŞA Bankın korporativ kreditləşmə məbləği isə 432 milyon manat artıb.

30 İyun 2024-cü il tarixində "PAŞA Bank"ın aktivlər üzrə bazar pay 16.8%, depozit portfeli üzrə bazar pay 18.6%, müştərilərə verilən kreditlər üzrə bazar payı 12.1% təşkil edib. 30 İyun 2023-cü il tarixində "PAŞA Bank"ın bazar payları müvafiq olaraq 17.8%, 21% və 12.9% təşkil etmişdi. Beləliklə, Bankın bazar payları aktivlər üzrə 1 faiz bəndi, depozit portfeli üzrə 2,4 faiz bəndi, müştərilərə verilən kreditlər üzrə isə 0,8 faiz bəndi azalıb.

Murad Süleymanov bildirib ki, 2024-cü ilin iyul ayının nəticələrinə əsasən, PAŞA Bankın bazar payları depozit portfelindəki hərəkət ilə əlaqədar olaraq nisbətən bərpa olunub, aktivlər üzrə bazar payı 17.3 %-ə, depozit portfeli üzrə bazar payı 19.4 %-ə yüksəlib. Müştərilərə verilən kreditlər üzrə bazar payı isə 12.1 % səviyyəsində qalıb. 

"Bu ilin 6 ayında fiziki şəxslərin müddətli depozitlərində 26% artım olub. Bunun səbəbləri faiz dərəcələrinin artırması və ötən il Vergi Məcələsinə edilən dəyişiklik - 18 ay və daha yüksək müddətə yerləşdirilən əmanətlərin ödəmə mənbəyində vergidən azad edilməsidir. Biz fiziki şəxs müştərilərin müraciətlərinin artmasını müşahidə edirik", - Murad Süleymanov qeyd edib.