2024-cü ilin ilk 6 ayı ərzində (yanvar-iyun) Azərbaycanın sığorta şirkətləri tərəfindən hesablanmış 725 milyon 161 min manat sığorta haqlarının 357 milyon 728 min manatı və ya 49,3%-i könüllü həyat sığortalarının, 184 milyon 98 min manatı və ya 25,4%-i icbari sığortaların payına düşüb.

Bu barədə Marja.az Mərkəzi Banka istinadən xəbər verir. 

Könüllü həyat və icbari sığortalar birlikdə bazarın 74,7%-ini və ya 541 milyon 826 min manatlıq hissəsini formalaşdırıb. Könüllü həyat və icbari sığortalar istisna olmaqla sığorta bazarının həcmi cəmi 183 milyon 335 min manat olub.

Həyat sığortalarının 337 milyon 898 min manatlıq hissəsi həyatın yaşam sığortasının hesabına formalaşıb. 

Könüllü həyat sığortalarına - həyatın yaşam sığortası, həyatın ölüm halından sığortası, əmək qabiliyyətinin sığortası və sağalmaz xəstəliklərdən sığorta daxildir. İcbari sığortalar isə  - istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortasından,  avtonəqliyyat vasitəsi sahiblərinin mülki məsuliyyətinin icbari sığortasından, daşınmaz əmlakın icbari sığortasından, daşınmaz əmlakın istismarı ilə bağlı mülki məsuliyyətin icbari sığortasından, sərnişinlərin icbari fərdi qəza sığortasından və digər icbari sığorta növlərindən ibarətdir.

CÜZİ ARTIB

2024-cü ilin ilk 6 ayı ərzində ötən ilin eyni dövrü ilə müqayisədə könüllü qeyri-həyat sığortası bazarı cəmi 1 milyon 462 min manat və ya 0,8% artaraq 183 milyon 335 min manat təşkil edib.

Cari ilin ilk 6 ayında artım icbari sığortalar üzrə 5 milyon 808 min manat, könüllü həyat sığortaları üzrə isə 68 milyon 946 min manat məbləğində olub. Bu artımın da 64 milyon 233 min manatı həyatın yaşam sığortasının payına düşüb.

Beləliklə, 2024-cü ilin ilk 6 ayı ərzində sığorta bazarındakı 76 milyon 217 min manatlıq artımın böyük hissəsi həyatın yaşam sığortasının və icbari sığortaların hesabına olub. 

Xəbər verdiyimiz kimi, 2024-cü ilin yanvar-iyun dövründə (ilk 6 ayda) Azərbaycanın sığorta şirkətləri tərəfindən 725 milyon 162 min manat sığorta haqları hesablanıb, 356 milyon 633 min manat sığorta ödənişləri həyata keçirilib. Qeyd edək ki, 2023-cü ilin ilk 6 ayı ərzində Azərbaycandakı sığorta şirkətləri tərəfindən 648 milyon 945 min manat sığorta haqları hesablanmış, 225 milyon 32 min manat sığorta ödənişləri həyata keçirilmişdi. Beləliklə, bu il hesablanmış sığorta haqları 11,7%, sığorta ödənişləri isə 58,5% artıb. 

 Sığorta növləri üzrə sığorta haqları və sığorta ödənişləri