"AccessBank" QSC 2024-cü ilin 1-ci yarısını (yanvar-iyun) 27 milyon 197 min manat xalis mənfəət ilə başa vurub. Bank ötən ilin eyni dövrünü 19 milyon 469 min manat xalis mənfəət ilə bağlamışdı. Beləliklə, "AccessBank"ın xalis mənfəəti 2024-cü ilin ilk 6 ayında 2023-cü ilin eyni dövrü ilə müqayisədə 7 milyon 728 min manat və ya 39,7% artıb.

GƏLİRLƏRİ ARTIB

Marja.az xəbər verir ki, 2024-cü ilin ilk 6 ayı ərzində "AccessBank"ın cəmi əməliyyat gəlirləri (faiz və qeyri-faiz gəlirləri) 17 milyon 740 min manat və ya 18% artaraq 116 milyon 393 min manat, cəmi əməliyyat xərcləri (faiz və qeyri-faiz xərcləri) 9 milyon 263 min manat və ya 12,5 % artaraq 83 milyon 498 min manat təşkil edib. Gəlirlər xərclərdən daha çox artdığı üçün Bankın əməliyyat mənfəəti  8 milyon 477 min manat artaraq 32 milyon 895 min manata yüksəlib (2023-cü ilin ilk 6 ayında 24 milyon 418 min manat).

Həmçinin, ilk 6 ayda Bank əməliyyat mənfəətindən 3 milyon 122 min manat mümkün zərərlər üçün yaradılan məqsədli ehtiyatlara ayırıb. 2023-cü ilin eyni dövründə "AccessBank" əməliyyat mənfəətindən 4 milyon 949 min manat ehtiyata ayırmışdı.

MÜŞTƏRİLƏRƏ VERİLƏN KREDİTLƏR ARTIB

2024-cü ilin yanvar-iyun dövründə "AccessBank" ın cəmi aktivləri 86 milyon 379 min manat və ya 6,2% artaraq 1 milyard 478 milyon 666 min manata yüksəlib. Bankın kredit portfeli (müştərilərə verilmiş cəmi kreditlər) 67 milyon 194 min manat və ya 6,6 % artaraq 1 milyard 80 milyon 959 min manata çatıb. O cümlədən, istehlak kreditləri portfeli 3 milyon 515 min manat artaraq 231 milyon 52 min manata, biznes kreditləri portfeli 61 milyon 515 min manat artaraq 841 milyon 560 min manata, ipoteka kreditləri portfeli 2 milyon 164 min manat artaraq 8 milyon 347 min manata qalxıb.

BANKDA DEPOZİTLƏR 1 MİLYARD MANATDAN ÇOXDUR

2024-cü ilin ilk 6 ayı ərzində "AccessBank"da cəmi depozitlər 21 milyon 850 min manat və ya 2% azalaraq 1 milyard 29 milyon 725 min manata düşüb. O cümlədən, Bankda fiziki şəxslərin depozitləri 9 milyon 569 min manat azalaraq 832 milyon 897 min manata, hüquqi şəxslərin depozitləri isə 12 milyon 281 min manat azalaraq 196 milyon 828 min manata düşüb.

30 İyun 2024-cü il tarixində "AccessBank" 167 milyon 352 min manat məcmu kapitala malik olub.