"Yapı Kredi Bank Azərbaycan" QSC 2024-cü ilin ilk 6 ayını (yanvar-iyun) 4 milyon 383 min manat xalis mənfəət ilə başa vurub. Bank 2023-cü ilin eyni dövrünü 3 milyon 604 min manat xalis mənfəət ilə bağlamışdı. Beləliklə, "Yapı Kredi Bank Azərbaycan"ın xalis mənfəəti 2024-cü ilin ilk yarısında ötən ilin eyni dövrü ilə müqayisədə 779 min manat və ya 21,6% artıb.

Marja.az xəbər verir ki, 2024-cü ilin ilk 6 ayı ərzində "Yapı Kredi Bank Azərbaycan"ın cəmi əməliyyat gəlirləri (faiz və qeyri-faiz gəlirləri)  6 milyon 217 min manat və ya 23,5 % artaraq 32 milyon 674 min manat, cəmi əməliyyat xərcləri (faiz və qeyri-faiz xərcləri) 5 milyon 922 min manat və ya 30,6 % artaraq 25 milyon 67 min manat təşkil edib. Gəlirlər xərclərdən daha çox artdığı üçün Bankın əməliyyat mənfəəti 295 min manat artaraq 7 milyon 407 min manata yüksəlib (2023-cü ilin ilk 6 ayında 7 milyon 112 min manat).

"Yapı Kredi Bank Azərbaycan" 2024-cü ilin yanvar-iyun dövründə əməliyyat mənfəətindən 1 milyon 431 min manat mümkün zərərlər üçün yaradılan ehtiyatlara ayrıb (2023-cü ilin eyni dövründə 2 milyon 277 min manat ayrılmışdı).

BANK BÖYÜYÜB, MÜŞTƏRİLƏRƏ VERİLƏN KREDİTLƏR ARTIB

2024-cü ilin yanvar-iyun dövründə "Yapı Kredi Bank Azərbaycan"ın cəmi aktivləri 11 milyon  674 min manat və ya 2,3% artaraq 526 milyon 535 min manata çatıb. O cümlədən, Bankın kredit portfeli (müştərilərə verilmiş kreditlər) 22 milyon manat və ya 7,5% artaraq 313 milyon 778 min manata yüksəlib. "Yapı Kredi Bank Azərbaycan"ın istehlak kreditləri portfeli 4 milyon 672 min manat artaraq 72 milyon 687 min manata, biznes kreditləri portfeli 8 milyon 51 min manat artaraq 196 milyon 934 min manata, ipoteka kreditləri portfeli isə 9 milyon 277 min manat artaraq 44 milyon 158 min manata qalxıb.

BANKDA ƏHALİNİN PULU ARTIB

2024-cü ilin ilk 6 ayı ərzində "Yapı Kredi Bank Azərbaycan"da cəmi depozitlər 7 milyon 122 min manat və ya 1,9% artaraq 373 milyon 817 min manata, o cümlədən fiziki şəxslərin depozitləri 24 milyon 574 min manat artaraq 114 milyon 532 min manata yüksəlib.

MƏCMU KAPİTALI ARTIB

30 İyun 2024-cü il tarixində "Yapı Kredi Bank Azərbaycan" 92 milyon 965 min manat məcmu kapitala malik olub. Bank 31 Mart 2024-cü il tarxində 90 milyon 745 min manat məcmu kapitala malik idi.

Qeyd edək ki, "Yapı Kredi Bank Azərbaycan" QSC "Yapı və Kredi Bankası A.Ş"nin (Türkiyə) törəmə bankıdır.