İnvestorlar bugün ABŞ-da inflyasiya məlumatlarının açıqlanmasını gözlədikləri üçün ABŞ dollarında müşahidə olunan bahalaşma tendensiyası səngiyib. Major valyutalar inflyasiya göstəriciləri öncəsi dollar qarşısında bir qədər bahalaşıblar.

Dollar 2023-cü ilin ikinci yarısında Federal Ehtiyatlar Sisteminin faiz artımına son verəcəyini bildirməsindən təsirlənən eniş tendensiyasından sonra, 2024-cü ilin ilk günlərindən etibarən daha möhkəm mövqe sərgiləməyə başlamışdı. Analitiklər dolların qiymətlərindəki bu artımı korreksiya kimi qiymətləndirərək cari il ərzində uçot faiz dərəcələrinin ümumilikdə 140 baza bəndi endiriləcəyini proqnozlaşdırırlar. İqtisadçıların böyük çoxluğu yumşaq monetar siyasətə keçidin mart ayından etibarən başlayacağını ehtimal edirlər. Bununla belə, inflyasiya məlumatları proqnozlardan artıq olarsa, faiz endirimləri prosesi yubana bilər.

Çərşənbə günü Nyu-York FED-in sədri Con Uilyams inflyasiyanın 2%-lik hədəfə endirilməsi üçün səylərin davam etdiyini bildirib və faiz endirimini gözləməyin hələ tez olduğu barədə xəbərdarlıq edib. 

İnflyasiyaya dair proqnozlara gəldikdə isə, dekabr ayı baza inflyasiyanın illik müqayisədə 3.8%-ə qədər azalaraq 2021-ci ilin əvvəlindən bəri ən aşağı səviyyəyə endiyi təxmin edilir.

Dollar indeksi hazırda 102.30 civarında qərarlaşarkənkən, avro 1.0975 dollar, funt-sterlinq 1.2750 dollar səviyyəsində, Avstraliya dolları və Yeni Zelandiya dolları isə müvafiq olaraq 0.6720 dollar və 0.6250 dollar hədlərində dalğalanırlar.

ABŞ-ın Bitcoin-ə sahib ETF-lərə icazə verməsi ilə bağlı spekulyasiyalar fonunda oktyabr ayından bəri 50%-dən çox bahalaşan “Bitcoin”, ABŞ qiymətli kağızlar tənzimləyicisi SEC tərəfindən ETF-lərə icazənin rəsmi olaraq təsdiqlənməsindən sonra demək olar ki, dəyişməyərək 46600$ dollar səviyyəsində qaldı.

Bugün həmçinin, Avropa Mərkəzi Bankının aylıq hesabatı və Amerikada İlk dəfə İşsizlik Müavinatı üçün Müraciətlərin Sayına dair göstəricilər investorların diqqət mərkəzində olacaq.

Məlumat İnvest-AZ İnvestisiya Şirkətinin analitikləri tərəfindən hazırlanıb.