Türkiyədə dolların qiyməti 28 lirəni də keçərək rekord qırıb.

Marja xəbər verir ki, İstanbulda sərbəst bazarında 1 dollar 28.0050 lirəni, avro isə 29.6630 lirəni görüb

Dünən dolların satış qiyməti 27,9180 lirə, avronun satış qiyməti isə 29,5290 lirə olmuşdu.

Birjada isə Dollar /Türk Lirəsi (TL) məzənnəsi 28,2141 lirəni test edib.

İsrail-Həmas müharibəsi riskləri artırıb, geo-siyasi vəziyyəti pisləşdirib.

Çində açıqlanan güclü iqtisadi artım məlumatlarına baxmayaraq, Yaxın Şərqdəki hadisələr bazarlara daha çox təsir etməkdə davam edir.

Asiyada birjaların əksəriyyəti mənfidir. 

Wall Street indeksləri fyuçerslərdə düşməkdə davam edir. Neftin qiyməti qalxmağa başlayıb “Brent” markalı neftin barreli 2 faiz bahalaşaraq 92 dollara çatıb. Dünya bazarında qızıl da baalaşır.

Qeyd edək ki, Qəzzada xəstəxanaya edilən hücum nəticəsində yüzlərlə dinc fələstinli həyatını itirib. Qəzza rəsmiləri İsrailin hava hücumları nəticəsində azı 500 nəfərin öldüyünü bildirib. İsrail ordusu, xəstəxananın Qəzzada yerləşən İslami Cihad təşkilatının uğursuz raket hücumu nəticəsində vurulduğunu bildirib.

ABŞ Müdafiə Nazirliyi hücuma görə kimin məsuliyyət daşıdığı barədə hələlik məlumata malik olmadığını bildirib. İsrailin baş naziri Binyamin Netanyahu da İsrail təyyarələrinin xəstəxanaya hücum etmədiyini bildirib və İslami Cihadı günahlandırıb.

Bölgənin bir çox şəhərində İsrail əleyhinə etirazlar keçirilib. Hücumdan sonra İordaniya, ABŞ prezidenti Co Bayden ilə Misir və Fələstin liderlərinin Əmmanda görüşünün ləğv edildiyini açıqlayıb. İsrailə səfər edəcək Bayden, partlayışdan "qəzəbləndiyini və dərindən kədərləndiyini" ifadə edərək, "milli təhlükəsizlik qrupundan baş verənlərlə bağlı məlumat toplamağa davam etməsini" xahiş etdiyini bildirib.

Fələstin lideri Mahmud Abbas xəstəxanaya hücumdan sonra üç günlük matəm elan edib və hücum baş verməsəydi, Bayden və digər liderlərlə görüşəcəyi İordaniyanı tərk edərək İordan çayının qərb sahilinə qayıdıb.

Vaşinqtondakı Yaxın Şərq İnstitutunun baş elmi işçisi Randa Slim məsələni dəyərləndirərkən, bölgədəki hər kəsin çox əsəbi olduğunu bildirib və belə şərh edib: “Əgər Bayden İsrailə gələrsə və İsrailin özünü müdafiə etmək hüququna malik olduğu bəyanatını təkrar edərsə, işlər çox çətin olacaq”.