"Fitch" kredit reytinqi agentliyi Türkiyənin kredit reytinqini yenidən "B" olaraq təsdiqləyib və 2 ildən sonra reytinq proqnozunu "neqativ"dən "stabil"ə yüksəlidib.

Marja.az xəbər verir ki, proqnozun "stabil" olaraq dəyişdirilməsinin səbəbi "qısamüddətli makro-maliyyə sabitliyi risklərini azaldan və tədiyə balansı təzyiqlərini yüngülləşdirən daha ənənəvi və ardıcıl siyasət kompleksinə qayıdışı əks etdirməsi"dir.

Türkiyə Cümhuriyyəti Mərkəzi Bankının (TCMB) 2023-cü ilin sonuna qədər uçot dərəcəsini 35 faizə yüksəldəcəyini və 2024-cü ildə də bu səviyyədə qalacağını bildirən Fitch, pul siyasətinin sərtləşdirilməsinin gələcək tempi və müddəti ilə bağlı yüksək qeyri-müəyyənliklərin olduğuna diqqət çəkib.

Yüksək inflyasiyanın ən böyük risk və problem olaraq qaldığını qeyd edən "Fitch"in il sonu inflyasiya proqnozu 65 faizdir.

"Fitch" Türkiyədə 2023-cü ildə 4,3 faiz, 2024-cü ildə isə 3 faiz iqtisadi artım gözləyir.

Ümumi beynəlxalq ehtiyatların may ayının ortalarından nəzərəçarpacaq dərəcədə bərpa olunduğu və 2023-cü ilin sonuna kimi 115 milyard dollara çata biləcəyi proqnozlaşdırılır.

Fitch-in mümkün reytinq yüksəldilməsinə səbəb ola biləcək amillərə də toxunub - mövcud siyasətin normallaşdırılması və balanslaşdırılması prosesinin davamlılığına inamın artması və bunun nəticəsində makroiqtisadi sabitliyin, o cümlədən inflyasiyanın davamlı azalması müsbət təsir göstərə bilər.

Açıqlamada bildirilib ki, cari əməliyyatlar kəsirinin davamlı olaraq kiçilməsi, kapital daxilolmalarının artması, beynəlxalq ehtiyatların səviyyəsi və tərkibində yaxşılaşmalar və dollarlaşmanın azalması nəticəsində xarici kövrəkliklərin azalması reytinqin mümkün yüksəldilməsinə səbəb ola bilər.

Fitch 2021-ci ilin dekabrında reytinq proqnozunu "neqativ"ə dəyişmiş, keçən ilin iyulunda isə kredit reytinqini "B+-dan "B"yə endirmişdir.