Türkiyənin Xəzinə və maliyyə naziri Mehmet Şimşek Türkiyə Cümhuriyyəti Mərkəzi Bankının (TCMB) faiz dərəcəsini 7,50 bənd artırmasından sonra sosial media hesabından paylaşım edib.

Marja xəbər verir ki, nazir Şimşek, “Biz qərarlıyıq! Qiymət sabitliyi bizim əsas prioritetimizdir...” açıqlamasını edib. 

Xəbər verdiyimiz kimi, Türkiyə Cümhuriyyəti Mərkəzi Bankı (TCMB) əsas faizini (uçot dərəcəsini) 7,50 bənd artıraraq 17,5%-dən 25%-ə yüksəldib. İqtisadçılar arasında keçirilmiş sorğuya görə, TCMB-nin faizini 20%-ə çatdıracağı gözlənilirdi. Beləliklə, Bankın qərarı bazarlar üçün sürpriz olub.

TCMB əvvəlki iclasda faizini 2,50 faiz bənd artıraraq 17,5%-ə çatdırmışdı.

Bakı vaxtı ilə saat 15:15-də Dollar/Türk Lirəsi məzənəsi 26,5761 lirə səviyyəsinə düşüb. Türk Lirəsi Dollar qarşısında 2%-dən çox bahalaşıb.

TCMB-nin press-relizində bildirilir:

"İdarə Heyəti inflyasiyanı mümkün qədər tez cilovlamaq və qiymət davranışının pisləşməsinə nəzarət etmək üçün monetar sərtləşdirmə prosesini davam etdirmək qərarına gəlib.

Son göstəricilər inflyasiyanın əsas tendensiyasının artmaqda davam etdiyini göstərir. Daxili tələbin güclü olması, yanacağın qiymətinin artması, əmək haqqı və valyuta məzənnələrindən qaynaqlanan xərc təzyiqləri inflyasiyanın artmasını şərtləndirən əsas amillərdir. 

Birbaşa xarici investisiyalar, xarici maliyyələşdirmə şərtlərinin yaxşılaşdırılması, ehtiyatların davamlı artırılması və turizm gəlirlərinin cari hesaba dəstəklənməsi qiymət sabitliyinə güclü töhfə verəcək.

Tətbiq edilən sərt pul siyasəti ortamüddətli dövrdə inflyasiyanı 5 faiz olan hədəfimizə salacaq. Sərtləşdirmə inflyasiya əhəmiyyətli yaxşılaşma əldə olunana qədər zərurət yarandıqda mərhələli şəkildə gücləndiriləcəkdir.

Faiz dərəcələrinin artırılması ilə yanaşı, İdarə Heyəti monetar sərtləşdirmə prosesini dəstəkləyəcək qərarlar qəbul etməyə davam edəcək.

İnflyasiya ilə bağlı göstəricilər və inflyasiyanın əsas tendensiyası yaxından izləniləcək və İdarə heyəti qiymət sabitliyi kimi əsas məqsədinə uyğun olaraq bütün alətlərdən qətiyyətlə istifadə etməyə davam edəcək".

Xatırladaq ki, Türkiyə Prezidenti Rəcəb Tayyib Ərdoğanın son zamanlara qədər apardığı siyasət nəticəsində TCMB bir həftəlik repo faizini (əsas faiz dərəcəsi) 2021-ci ildəki 19%-dən 8,5%-ə endirilmişdi. Seçki öncəsi yüksək inflyasiyaya baxmayaraq, faiz dərəcələri aşağı səviyyədə saxlanılmış, TL-nin daha da ucuzlaşmasının qarşısını almaq üçün TCMB ehtiyatlarından istifadə edilmişdi. Seçkidən sonra Maliyyə naziri və Mərkəzi Bankın sədri dəyişdirilmiş, faizin artırılmasına qərar verilmişdir. İyun və iyul ayından TCMB faizini 9 faiz bəndi artıraraq 8,5%-dən 17,5%-ədək yüksəltmişdi. Türkiyə Mərkəzi Bankı inflyasiya proqnozunda əhəmiyyətli bir yaxşılaşma əldə olunana qədər mərhələli şəkildə sərt pul siyasətinin davam edəcəyini bildirilmişdi.

Həmçinin oxu

Türkiyə Mərkəzi Bankının sürpriz qərarından sonra Lirə bahalaşdı