Rusiya Mərkəzi Bankının İdarə Heyəti 2023-cü il avqustun 15-dən əsas faiz dərəcəsini 3,50 faiz bəndi artıraraq illik 12,00%-ə çatdırmaq barədə qərar qəbul edib.

İndiyədək uçot dərəcəsi 8,5% səviyyəsində idi. Rusiya Mərkəzi Bankı inflyasiyanın sürətlənməsi ilə bağlı tendensiyalar səbəbindən iyulda uçot dərəcəsini 8,5%-ə qaldırmışdı.

Marja.az xəbər verir ki, bu qərar qiymət sabitliyi ilə bağlı riskləri məhdudlaşdırmaq məqsədilə qəbul edilib. 

Rusiya Bankının proqnozuna görə, davam edən pul siyasəti nəzərə alınmaqla, illik inflyasiya 2024-cü ildə 4%-ə qayıdacaq.

Dünən Rusiyada dolların məzənnəsi 101 rublu, Avronun məzənnəsi isə 111 rublu keçmişdi. Bundan sonra Rusiya Mərkəzi Bankı avqustun 15-də uçot dərəcəsi ilə bağlı İdarə Heyətinin növbədənkənar iclasının keçirəcəyini açıqlamışdı. Təqvimə görə, növbəti iclas Sentyabrın 15-də keçiriləcəkdi.

Rusiya Mərkəzi Bankının uçot dərəcəsini 3,50 faiz bəndi artırması barədə qərarından sonra rubl dollara nisbətdə möhkəmlənib.Bakı vaxtı ilə saat 11:29-da dollar 96,1 rubl dəyərində idisə, 10:30-da məzənnə 95,5 rubla düşüb. Eyni zamanda, avronun məzənnəsi təxminən 70 qəpik geriləyərk 104,97 rubldan 104,28 rubla düşüb.

XXX

Rusiya Mərkəzi Bankının press-relizindən:

 ▪️ Rusiya Mərkəzi Bankının İdarə Heyəti 15 avqust 2023-cü il tarixindən etibarən uçot dərəcəsini 3,50 faiz bəndi artıraraq illik 12,00% olaraq müəyyən etməyə qərar verdi.

▪️ Belə bir qərarın məqsədi qiymət sabitliyi üçün riskləri məhdudlaşdırmaqdır.

▪️ Avqustun 7-nə illik inflyasiya 4,4%-ə çatıb.

▪️ Mövsümi təsirlər xaric son üç ayda orta illik qiymət artımı 7,6% təşkil edir.

▪️ Baza inflyasiyası 7,1%-ə yüksəlib.

▪️ Davamlı inflyasiya təzyiqi istehsalın genişləndirilməsi imkanlarını üstələyən daxili tələbin artması ilə əlaqədardır.

▪️ Bu da idxala olan tələb vasitəsilə rublun məzənnəsinin dinamikasına təsir edir və bu da öz növbəsində inflyasiya gözləntilərini gücləndirir.

▪️ Qiymət artımının cari tempi davam edərsə, 2024-cü ildə inflyasiyanı hədəfdən yuxarı çıxarmaq təhlükəsi yaradır.

▪️ Qəbul edilmiş qərar inflyasiyanın 2024-cü ildə 4%-ə qaytarılması və gələcəkdə bu səviyyədə sabitləşməsinə yönəlib.

▪️ Uçot dərəcəsi ilə bağlı sonrakı qərarlar qəbul edərkən Rusiya Mərkəzi Bankı bir sıra amilləri, o cümlədən faktiki və gözlənilən inflyasiyanın dinamikasını, iqtisadiyyatın bərpasını, daxili və xarici şəraitin dəyişməsi ilə bağlı riskləri, eləcə də maliyyə göstəricilərinin reaksiyasını nəzərə alacaq. 

▪️ Proqnozlara görə, davam edən pul siyasəti ilə illik inflyasiya 2024-cü ildə 4%-ə qayıdacaq.

▪️ İdarə Heyətinin növbəti iclası 15 sentyabr 2023-cü il tarixinə təyin edilib.