"Expressbank" ASC 2023-cü ilin birinci yarısını (yanvar-iyun) 6 milyon 320 min manat xalis mənfəət ilə başa vurub. Bank ötən ilin eyni dövrünü 8 milyon 28 min manat xalis mənfəət ilə bağlamışdı. Xalis mənfəətinin azalması əməliyyat xərclərinin əməliyyat gəlirlərindən daha çox artması və mümkün zərərlər üçün yaradılan məqsədli ehtiyatlara ayırma ilə əlaqədardır.

Marja.az xəbər verir ki,"Expressbank"ın faiz gəlirləri 2023-cü ilin birinci yarısında 2022-ci ilin birinci yarısı ilə müqayisədə 14,4% aratraq 26 milyon 952 min manat, qeyri-faiz gəlirləri isə 4,2% artaraq 9 milyon 197 min manat təşkil edib.

2023-cü ilin birinci yarısında "Expressbank"ın cəmi əməliyyat gəlirləri (faiz və qeyri-faiz gəlirləri) 36 milyon 148 min manat, cəmi əməliyyat xərcləri (faiz və qeyri-faiz xərcləri) 27 milyon 762 min manat, əməliyyat mənfəəti 8 milyon 387 min manat təşkil edib. Müqayisə üçün qeyd edək ki, 2022-ci ilin birinci yarında "Expressbank"ın cəmi əməliyyat gəlirləri 32 milyon 386 min manat, cəmi əməliyyat xərcləri 23 milyon 492 min manat, əməliyyat mənfəəti 8 milyon 895 min manat təşkil etmişdi. "Expressbank"ın xalis mənfəətinin cüzi azalması əməliyyat xərclərinin əməliyyat gəlirlərindən daha çox artması ilə əlaqədardır. Belə ki, Bankın əməliyyat mənfəətinin 3 milyon 762 min manat artmasına qarşılıq, əməliyyat xərcləri 4 milyon 270 min manat artıb. 

"Expressbank" ASC 2023-cü ilin birinci yarısında mümkün zərərlər üçün yaradılan məqsədli ehtiyatlara 535 min manat ayırıb və 1 milyon 531 min manat mənfəət vergsi ödəyib. Ötən ilin eyni dövründə ehtiyatdan azad olmuş 869 min manat mənfəətə əlavə edilmişdi. 

BANK BÖYÜYÜB

"Expressbank" cəmi aktivləri ötən ilin sonu ilə müqayisədə 12% artaraq 30 iyun 2023-cü il tarixində 489 milyon 458 min manat təşkil edib.

"Expressbank" kredit portfeli (müştərilərə verilmiş kreditlər) 18% və ya 53 milyon 461 min manat artaraq 350 milyon 545 min manata çatıb. Cari ilin ilk 6 ayında "Expressbank"ın istehlak kreditləri portfeli 15 milyon 968 min manat artaraq 175 milyon 337 min manata, biznes kreditləri portfeli 9 milyon 345 min manat artaraq 105 milyon 190 min manata, ipoteka kreditləri portfeli isə 28 milyon 147 min manat artaraq 70 milyon 17 min manata yüksəlib.

"Expressbank"da depozitlər 2023-cü ilin birinci yarısında 2022-ci ilin sonu ilə müqayisədə 1,5% və ya 2 milyon 931 min manat aratarq 196 milyon 38 min manata yüksəlib. O cümlədən, fiziki şəxsləri depozitləri 4 milyon 212 min manat artaraq 155 milyon 450 min manata yüksəlib, hüquqi şəxslərin depozitləri isə 1 milyon 283 min manat azalaraq 40 milyon 587 min manata düşüb. 

30 İyun 2023-cü il tarixində"Expressbank" 121 milyon 375 min məcmu kapitala malik olub.