"Rusiya ordusu son bir neçə gündə Ukraynanın Odessa limanında infrastrukturu bombalayıb, 60 min ton taxılın yandırıb. Rusiya təkcə taxıl müqaviləsindən çıxmayıb. Onlar taxılı da yandırırlar".

Marja xəbər verir ki, bunu Avropa ittifaqının Xarici Əlaqələr və Təhlükəsizlik Siyasəti üzrə Ali Nümayəndəsi Josep Borrell bildirib.

Rusiyanın etdiklərini "barbar" olaraq xarakterizə edən Borrell, "Bu, dünyada böyük bir qida böhranına səbəb olacaq" deyib.

Türkiyə Milli Müdafiə Nazirliyinin verdiyi məlumata görə, bir il ərzində mindən çox gəmi ilə ehtiyacı olan ölkələrə və qlobal bazarlara təxminən 33 milyon ton taxıl və ərzaq məhsulları çıxarılıb.

Tərəflərin razılığı ilə təşəbbüs 19 noyabr 2022, 18 mart və 18 may 2023-cü il tarixlərində uzadılıb. Üç dövr ərzində üç qitənin 45 ölkəsinə taxıl daşınıb.

Dəhlizdən keçən taxılın 40%-i Avropaya, 30%-i Asiyaya, 13%-i Türkiyəyə, 12%-i Afrikaya, 5%-i Yaxın Şərqə daşınıb.

Saziş iyulun 17-də başa çatıb. Rusiya şərtlərinin yerinə yetirilmədiyi üçün müddəti uzatmayıb.

Müqavilənin ləğvi ilə Avropa Birliyi ölkələrindən və ABŞ-dan sərt reaksiyalar və müqavilənin uzadılması çağırışları edilib.

Kremlin sözçüsü Dmitri Peskov bildirib ki, taxıl sazişindən sonra, Rusiya, Ukraynanın taxıl tədarükü əvəzinə inkişaf etməmiş ölkələrə kömək etməyə davam edəcək.

Peskov Qara Dəniz Taxıl Dəhlizi Sazişinin dayandırıldığını və müvafiq şərtlər yerinə yetirildikdə Rusiyanın müqaviləyə qayıdacağını bildirib.

Digər tərəfdən, Rusiya prezidenti Vladimir Putin müqavilənin geri qaytarıla biləcəyini, lakin taxıl müqaviləsinin indiki formada davam etdirilməsinin Rusiya üçün mənasızlaşdığını bildirərək, müqavilənin davam etdirilməsi üçün Rusiya banklarının, qida və gübrə tədarükü xidməti göstərən maliyyə qurumlarının qarşısındakı bütün maneələrin aradan qaldırılması və Rusiya gəmilərinin sığorta probleminin həll edilməli olduğunu bildirib.