"Bank Melli İran" Bakı filialı 2023-cü ilin ilk yarısını (yanvar-iyun) 2 milyon 83 min manat xalis mənfəət ilə başa vurub. Filial 2022-ci ilin ilk yarısını 806 min manat xalis mənfəət ilə bağlamışdı. Beləliklə, 2023-cü ilin ilk yarısında "Bank Melli İran" Bakı filialının xalis mənfəəti 2,6 dəfə artıb. Xalis mənfəətin artması Bankın cari biznes fəaliyyətindən qaynaqlanmır. 

Marja.az xəbər verir ki, 2022-ci ilin birinci yarısında "Bank Melli İran" Bakı filialının faiz gəlirləri 1 milyon 735 min manat ikən, 2023-cü ilin birinci yarısında 1 milyon 495 min manata düşüb. Haqq və komissiya gəlirlər isə 87 min manatdan 47 min manata düşüb.

Gəlirlərinin azalmasına qarşı xalis mənfəətin artması aktivlər üzrə ehtiyatların yaradılmasına ayırmalardan qayıdan (azad olan) vəsaitin artması ilə əlaqədardır. Əgər 2022-ci ilin ilk 6 ayında ehtiyatdan 99 min manat qayırmışdısa, 2023-cü ilin eyni dövründə 1 milyon 348 min manat azad olub və gəlirə əlavə edilib. 

Ötən ilin sonunda "Bank Melli İran" Bakı filialının kredit portfeli (müştərilərə verilmiş kreditlər) 9 milyon 467 min manata çatmışdı. Bu il Bankın kredit portfeli 2 milyon 332 min manat azalaraq 7 milyon 135 min manata düşüb. Filialın cəmi aktivləri isə 19 milyon 561 min manat azalaraq 77 milyon 59 min  manata düşüb. Filialın cəmi aktivləri ötən ilin sonunda 96 milyon 621 min manata çatmışdı. 

"Bank Melli İran" Bakı filialında müştəri hesablarındakı vəsaitlər 6 dəfə azalaraq 8 milyon 904 min manatdan 1 milyon 490 min manata düşüb.

Bu ilin Mayında mətbuatda dərc olunan məlumatlara görə, Azərbaycan Mərkəzi Bankı (AMB) İran Milli Bankının Bakı filialının (“Bank Melli İran-Baku”) fəaliyyətini məhdudlaşdırıb. Məlumata görə, tənzimləyici qurum kredit təşkilatına məktub göndərib və hesabdan pul götürmək istisna olmaqla bütün bank əməliyyatlarının (depozit qəbulu, kredit verilməsi və s.) dayandırılmasını tələb edib.