(®) Unibank Cbonds Awards CIS-2023 nominasiyasının qalibi seçilib.

MDB ölkələri üzrə istiqraz bazarında ölkələrin ən yaxşı iştirakçılarına verilən mükafatın bu il 14 qalibi olub. Azərbaycandan yeganə olaraq Unibank və bankın törəmə şirkəti olan “Unicapital” İnvestisiya Şirkəti nominantlar siyahısında yer alıb. “Unibank”ın Azərbaycan qiymətli kağızlar bazarının aktiv iştirakçılarından olması, yüksək gəlirli və alıcılar tərəfindən böyük maraqla qarşılanan istiqraz buraxılışları həyata keçirməsi, MDB İstiqraz Konqresi tərəfindən yüksək dəyərləndirilib.

Qeyd edək ki, MDB İstiqraz Konqresi MDB ölkələri və digər inkişaf etməkdə olan ölkələrin borc bazarı mütəxəssislərini bir araya gətirən illik tədbirdir. Əsas müzakirə mövzuları yerli istiqraz bazarlarında mövcud tendensiyalar, avrobond bazarının inkişaf perspektivləri, makro proqnozlar və regionlarda investisiya ideyalarıdır. Konqresin mükafatlandırma mərasimləri 2014-cü ildən etibarən hər il keçirilir.

Unibank builki nominasiyaya ötən ilin noyabrında buraxılan dollar istiqrazlarına görə layiq görülüb. “Azərbaycanda ilkin yerləşdirmə üzrə ən yaxşı əqd” kimi dəyərləndirilən bu emissiya çərçivəsində illik faiz dərəcəsi 8% olmaqla, 12 milyon ABŞ dolları həcmində istiqraz buraxılışı həyata keçirilib. Bakı Fond Birjasında rəqabətli hərrac üsulu ilə həyata keçirilən yerləşdirilməsində emissiyanın bütün həcmi 23 investor tərəfindən alınmışdı. Sayı 12 000 ədəd olan sənədsiz adlı, faizli, təmin edilməmiş istiqrazların hər birinin nominal dəyəri 1000 ABŞ dolları, faizlərin ödəniş müddəti üç aydan bir, tədavül müddəti isə 6 ildir. Bu qiymətli kağızlar hazırda ölkə bazarında dollar valyutasında təqdim olunan ən yüksək gəlirli istiqrazlardandır. Emissiyanın təşkilatçısı və anderrayteri “Unicapital İnvestisiya Şirkəti” ASC olub.

Qeyd edək ki, “Unibank”ın bütün qiymətli kağızları Bakı Fond Birjasının listinqinə daxil edilib. Bütün səhm və istiqrazların listinqə daxil edilməsi mövcud normativlərə və qanunvericiliyin tələblərinə uyğun olmaqla yanaşı, bankın dayanıqlı maliyyə, müasir korporativ idarəetmə və şəffaf hesabatlılıq göstəricilərinə malik olmasını nümayiş etdirir.

Unibank-Sənin Bankın!