(®) Həyata keçirdikləri Korporativ Sosial Məsuliyyət layihələri ilə hər zaman cəmiyyətimiz üçün faydalı işlərə imza atan PAŞA Sığorta və PAŞA Həyat şirkətlərinin Naxçıvanda birgə sosial tədbiri baş tutub.

Heydər Əliyevin 100 illiyi, həmçinin 1 İyun Uşaqların Beynəlxalq Müdafiəsi Gününə həsr olunan tədbir ümummilli liderin anadan olduğu Naxçıvan şəhərində baş tutub. Tədbirin keçirilməsində əsas məqsəd Vətən müharibəsində həyatlarını fəda etmiş şəhid və qazilərin övladlarına bayram sevinci yaşatmaq olub. Naxçıvan şəhərində məskunlaşan şəhid və qazi övladlarının iştirakı ilə həyata keçirilən tədbirdə uşaqlar üçün əyləncəli proqram və konsert təşkil edilib. Tədbirdə istedadlı uşaqlar öz xüsusi məharətlərini nümayiş etdiriblər, həmçinin tədbirin sonunda uşaqlara xüsusi hədiyyələr təqdim edilib.

Tədbirdə çıxış edən PAŞA Sığorta şirkətinin nümayəndəsi Məruz Əzməmmədova: “Bu gün bizim üçün mənəvi dəyəri yüksək olan bir tədbiri həyata keçirmək üçün buradayıq. Vətən müharibəsindən sonrakı dövrlərdə hər zaman şəhid və qazi ailələrimizin yanında olmağa, onların çətinliklərinə dəstək olmağa çalışırıq. İnanırıq ki, bu övladlarımız ümummilli liderimizin bizə əmanət etdiyi dövlətin inkişafında mühüm rol oynayacaq, dövlətimizi öz adları ilə birgə daha da yüksəklərə ucaldacaqlar”, – deyə öz fikirlərini paylaşıb.

PAŞA Həyat şirkətinin nümayəndəsi Məryam Xanım Abasəliyeva isə öz çıxışında: “PAŞA Həyat Sığorta” ASC özünün çoxşaxəli korporativ sosial məsuliyyət strategiyası çərçivəsində mütəmadi olaraq müxtəlif tədbir və aksiyalar həyata keçirir. Uzun illərdir ki, şirkətimiz bu istiqamətdə maariflənmənin təşviqi məqsədilə genişmiqyaslı aksiyalar təşkil edir, müxtəlif təhsil proqramlarının sponsoru qismində çıxış edir. Bu gün isə Naxçıvan şəhərində şəhid və qazi ailələri ilə görüşdən məmnunluq və fəxarət hissi duyuruq”, – deyə bildirib.

Qeyd edək ki, Naxçıvan şəhərində məskunlaşan əhaliyə peşəkar sığorta xidmətlərinin göstərilməsi məqsədilə növbəti aylar ərzində PAŞA Sığorta və PAŞA Həyat şirkətlərinin birgə ofisi fəaliyyətə başlayacaq.