Beynəlxalq Valyuta Fondunun (BVF) sədri Kristalina Georgiyeva ABŞ-da inflyasiyanın 2 faizlik hədəfə endirilməsi üçün uzunmüddətli sərt pul siyasətinin tələb olunacağını bildirərək, “Daha uzun müddət ərzində faiz dərəcələrinin bir qədər yüksək olması lazım gələcək" deyib.

Marja xəbər verir ki, Georgieva ABŞ iqtisadiyyatı ilə bağlı qiymətləndirmələr edib.

ABŞ iqtisadiyyatının dayanıqlı olduğunu sübut etdiyini bildirən Georgieva, istehlakçı tələbinin yaxşı qorunduğunu, əvvəlcə yığımlarla, son zamanlarda isə istifadə edilə bilən gəlirin artması ilə dəstəkləndiyini söyləyib.

Georgieva, ABŞ iqtisadiyyatının bu il 1,2 faiz artacağını və 2024-cü ilə qədər sürətini qoruyacağını gözlədiklərini ifadə edib.

2024-cü ilin sonuna qədər işsizliyin tədricən artacağını və 4,5 faizə yaxınlaşacağını gözlədiklərini vurğulayan Georgieva, əmək bazarının hələ də kifayət qədər güclü olduğunu vurğulayıb.

Georgieva, davamlı tələbi və güclü əmək bazarını "iki tərəfli qılınc" kimi təsvir edərək, bunun amerikalı ailələri dəstəkləməyə kömək etdiyini, eyni zamanda inflyasiyanın gözləniləndən daha davamlı olmasına töhfə verdiyini əlavə edib.

İnflyasiyanın FED-in hədəfinin üzərində qalacağı gözlənilir

Əsas inflyasiyanın bu ilin sonuna doğru tədricən 4 faiz civarına düşəcəyini gözlədiklərini ifadə edən Georgieva, inflyasiyanın 2024-cü il boyu FED-in orta müddətli hədəfinin üzərində qalacağını gözlədiklərini ifadə edib.

"İnflyasiyanın 2 faizlik hədəfə qaytarılması qəti şəkildə uzunmüddətli sərt pul siyasəti tələb edəcək", - Georgieva deyib.

Faiz dərəcələrinin 2024-cü ilin sonuna qədər 5,25% ilə 5,5% arasında qalmasını gözlədiklərini ifadə edən Georgieva, "Daha uzun müddət faiz dərəcələrinin bir az daha yüksək olması lazım olacaq",- bildirib.

İqtisadiyyat və inflyasiya dinamikası ilə bağlı hələ də yüksək qeyri-müəyyənliyin olduğuna diqqət çəkən Georgieva, FED-in diqqətli ünsiyyətinin vacibliyini vurğulayıb.

“Dövlət borcunun azaldılması üçün daha çox iş görülməlidir” 

BVF sədri Georgiyeva ABŞ-ın dövlət borcunu azaltmaq üçün daha çox iş görülməli olduğunu bildirib.

Açıq ticarət siyasətinin davam etdirilməsinin ABŞ iqtisadiyyatının böyüməsinə əhəmiyyətli dərəcədə töhfə verdiyini bildirən Georgieva, son bir neçə ildə tədarük zəncirlərinin dayanıqlılığına dair qlobal narahatlıqların artdığını deyib.

Georgieva, bunun qlobal təchizat zəncirində parçalanma riski yaratdığını və ticarət tərəfdaşları tərəfindən cavab tədbirləri gördüyünü deyib və bunun ABŞ-ın iqtisadi inkişafı, məhsuldarlığı və məşğulluğu üçün son nəticədə pis olacağından narahatlığını bildirib.

ABŞ-da borc limiti ilə bağlı sualları cavablandıran Georgieva, "Biz mümkün qədər tez bir həll yolu görmək istəyirik" deyib.

Georgieva vurğulayıb ki, "borc limiti ilə bağlı yaxşı nəticəyə gəlmək ABŞ və dünya iqtisadiyyatı üçün “çox vacibdir”.