Smartfon bazarı 2023-cü ilin birinci rübündə 7 faiz kiçilib.

Marja xəbər verir ki, "Counterpoint" texnologiya bazarı araşdırma firmasının məlumatına görə, ümumi smartfon bazarı 2023-cü ilin birinci rübündə illik 14% və əvvəlki rüblə müqayisədə 7% azalaraq cəmi 280,2 milyon ədəd təşkil edib. 

“Samsung” satış ədədi üzrə “Apple”ı qabaqlayıb, lakin gəlirlilik baxımından geri qalır

Gəlirlər də illik müqayisədə 7 faiz azalaraq 104 milyard dollarla rekord minimuma düşüb.

Samsung satış sayı üzrə liderliyi ələ keçirib. Cənubi Koreyanın elektronika nəhəngi “Samsung” 2023-cü ilin birinci rübündə smartfon satışında az fərqlə “Apple”ı geridə qoyub. 2023-cü ilin birinci rübünün nəticələrinə görə, Samsung ümumilikdə 60,6 milyon ədəd smartfon satıb.  Apple isə birinci rübdə gəlir baxımından üstünlüyünü qoruyub saxlayıb. iPhone telefonlarını istehsal edən "Apple" Cənubi Koreyalı rəqibi üzərində əhəmiyyətli üstünlük əldə edərək bazarın gəlirinin də yarısını qazandığını açıqlayıb. "Apple" ilk rübdə iPhone smartfonlarının satışından 51,3 milyard dollar əldə edib.

"Counterpoint"in Tədqiqatlar üzrə Direktoru Jeff Fieldhack, "Apple-ın uğurlu fəaliyyəti onun müştəri bazasının davamlı loyallığı ilə şərtlənir" deyib. Şirkətin inkişaf edən ekosistemi istehlakçıları daha ucuz alternativlər axtarmaqdan çəkindirir. "Apple iqtisadi və digər dalğalanmalara rəqiblərindən daha yaxşı dözür, eyni zamanda sarsılmaz sədaqətdən qazanır".

"Counterpoint" analitiki Tarun Pathak, “Smartfon bazarına təsir edən davamlı problemlərin tezliklə aradan qalxması ehtimalı azdır. Bundan əlavə, OPEC ölkələrinin neft hasilatını azaltmaq barədə son qərarı inflyasiyanın yüksəlməsinə və istehlakçıların xərcləmə gücünün azalmasına səbəb ola bilər. "Sənaye miqyasında tənəzzül smartfon bazarındakı bir çox əsas oyunçunun maliyyə nəticələrinə nəzərəçarpacaq dərəcədə təsir göstərmişdir."