Rəsmi Ər-Riyad, neftə tavan qiymət tətbiq etməyə qərar verən ölkələrə neft satmayacaq.

Marja xəbər verir ki, bunu Səudiyyə Ərəbistanının energetika naziri Əbdüləziz bin Salman Əl Səud çərşənbə axşamı "Energy Intelligence" nəşrinə müsahibəsində deyib .

"Əgər Səudiyyə Ərəbistanının neft ixracı məhdudiyyətlərə məruz qalarsa, tədarükümüzə qiymət tavanı tətbiq edən heç bir ölkəyə neft satmayacağıq və neft hasilatı azaldacağıq. Digər dövlətlər də eyni şeyi etsə, təəccüblənmərəm", - Əbdüləziz bin Salman Əl Səud ABŞ hökumətinin OPEC üzvləri və onların tərəfdaşlarına qarşı antiinhisar iddiaları qaldıra biləcəyini nəzərdə tutan NOPEC (Neft İstehsal və İxrac edən Kartellər Aktı) antikartel qanun layihəsini şərh edərkən bildirib.

Nazirin sözlərinə görə, qanun layihəsinin qəbulu neft bazarında tələb-təklif balansının pozulmasına gətirib çıxaracaq.

"NOPEC qanun layihəsi ehtiyat gücün əhəmiyyətini və bazarın sabitliyi üçün ehtiyat gücün olmamasının nəticələrini nəzərə almır. NOPEC həmçinin neft sənayesinə sərmayələri sarsıdacaq və qlobal tədarükün gələcək tələbdən xeyli geri qalmasına səbəb olacaq", - o vurğulayıb. 

Bundan əlavə, nazir neftin qiymətinin məhdudlaşdırılması siyasətini tənqid edib, çünki bu, bazarlarda volatilliyə səbəb olur və sənayenin inkişafını ləngidir: “Mən avqust və sentyabr aylarında rəsmi olaraq bəyan etdiyim mövqeyimi təkrar etməyə məcburam, bu da odur ki, belə bir siyasət (neft qiymətlərinin məhdudlaşdırılması) qaçılmaz olaraq bazarın qeyri-sabitliyini və dəyişkənliyini gücləndirəcək və neft sənayesinə mənfi təsir göstərəcək”,

Nazir qeyd edib ki, OPEC+ alyansı qlobal enerji bazarının sabitliyini təmin etmək üçün “hər cür səy göstərib və buna nail olub”.

Ötən il mayın 5-də Senatın Hüquq Komitəsi NOPEC-in antikartel qanun layihəsini təsdiqləyib. Onun məqsədi ABŞ məhkəmələrinə OPEC ölkələri və Vaşinqtonun neft kartelləri ilə bağlı sövdələşmələrdə iştirak etdiyinə inandığı digər dövlətlərə qarşı antiinhisar işlərinə baxmaq səlahiyyəti verməkdir.

Qeyd edək ki 20 ilə yaxındır ki, bu qanun layihəsini qəbul etməyə çalışırlar. 2007-ci ildə ABŞ-ın 43-cü prezidenti Corc Buşun dövründə bu təşəbbüsün variantlarından biri həm Senatdan, həm də Konqresin Nümayəndələr Palatasından keçib. Sonra dövlət başçısı veto qoyacağını bildirdiyi üçün onu imzalanması  üçün göndərməyiblər.