Dünyanın ən böyük investisiya şirkətlərindən biri olan "Vanguard Group", Türkiyə prezidenti Rəcəb Tayyib Ərdoğanın 20 ildə ilk dəfə seçkini uduzması halında Türkiyənin istiqraz bazarında böyük potensialın ortaya çıxacağını proqnozlaşdırıb.

Marja xəbər verir ki, təxminən 7,1 trilyon dolları idarə edən Vanguard Group Inc-in İnkişaf Etməkdə Olan Bazarlarda Sabit Gəlirli Qiymətli Kağızlar Departamentinin rəhbəri Nik Eisinger, may ayında keçiriləcək prezident seçkisindən əvvəl Türkiyə üçün bəzi "çəki azaltmaq" mövqeləri bağlamağa başladıqlarını bildirib.

Bu addım "Vanguard"ı Ərdoğan dövrünün sona çatması ehtimalı üçün mövqe tutan investorlar sırasına daxil edir. Xarici investorlar lirədəki aktivlərini rekord səviyyəyə endirirlər. Son 5 ildə istiqraz və səhm bazarlarında 60 milyard dollarlıq xaricə axın olub.

Bloomberg-ə danışan Eisinger, “Ərdoğan itirərsə, Türkiyə istiqrazları çox qazanclı ola bilər. Ərdoğan qalib gəlsə, çox güman ki, ənənəvi olmayan faiz siyasəti və kredit ekspansiyasına davam edəcək və o zaman xarici maliyyə çatışmazlığı böyük miqyasda qalacaq”, deyib.  

Ərdoğanın yüksək faizlərin inflyasiyanın səbəbi olduğu tezisi ilə Türkiyə Cümhuriyyəti Mərkəzi Bankı (TCMB) 2018-ci ildən bəri faiz dərəcələrini aşağı səviyyədə saxlayıb. Bu siyasətin əks təsiri olaraq yüksək inflyasiya, lirənin zəifləməsi və lirədəki alətlərə "iştahın" getdikcə azalması əcnəbilərin ölkəni tərk etməsi ilə nəticələnib.

“Altılı masa” kimi tanınan müxalifətin Millət bloku bu həftənin əvvəlində CHP lideri Kamal Kılıçdaroğlunu prezidentliyə namizəd elan edib. Kılıçdaroğlu deyir ki, onlar Ərdoğanın siyasətini tərsinə çevirəcəklərinə söz verirlər, mərkəzi bankın müstəqilliyini və iqtisadi problemlərə daha bazar dostu yanaşmanı mənimsəyəcəklər.

Eisinger deyib ki, müxalifət seçkidə qalib gələrsə, məzənnənin düşməsinə icazə veriləcək. 

Türkiyə hakimiyyəti son altı ayda lirəni tədricən ucuzlaşma xəttində nəzarətdə saxlayıb.

Eisenger, “Ərdoğanın uduzduğu ssenaridə valyuta istiqrazları ən yaxşı variantlardan biri ola bilər. Yeni iqtidarın dövründə çox güman ki, Dollar/TL məzənnəsi düşməli olacaq (Lirə bahalaşacaq, dollar ucuzlaşacaq - red)”, -deyib.

"RBC Global Asset Management Fund"da menecer Laurence Bensafi eyni şeyin səhm bazarı üçün də keçərli ola biləcəyinə inanır.

"Sorğular müxalifətin irəlidə olduğunu göstərməyə başlasa, bəzi xarici investorlar geri qayıdacaqlar",-  Bensafi deyib.