"Muğanbank" ASC 2022-ci il üzrə maliyyə göstəricilərini açıqlayıb.

Marja.az xəbər verir ki, "Muğanbank" ASC 2022-ci ili 57 min manat xalis mənfəət ilə başa vurub. Bank 2021-ci ili 1 milyon 552 min manat xalis mənfəət ilə bağlamışdı. Xalis mənfəətin azalması Bankın əməliyyat mənfəətinin böyük hissəsini ehtiyatın yaradılmasına yönəltməsi ilə əlaqədardır. Ötən il "Muğanbank"ın gəlirləri artıb, əməliyyat mənfəəti 11 dəfə çox olub.

Belə ki, ötən il "Muğanbank"ın cəmi əməliyyat gəlirləri 86 milyon 11 min manat (+37,2% və ya 23299 min manat), cəmi əməliyyat xərcləri 69 milyon 449 min manat (+13,4% və ya 8229 min manat), gəlirlər xərcləri üstələdiyindən əməliyyat mənfəəti 16 milyon 562 min manat təşkil edib. 

Müqayisə üçün qeyd edək ki, 2021-ci ildə Muğanbank"ın cəmi əməliyyat gəlirləri 62 milyon 712 min manat, cəmi əməliyyat xərcləri 61 milyon 220 min manat, əməliyyat mənfəəti 1 miylon 492 min manat təşkil etmişdi. Mümkün zərərlər üçün yaradılan ehtiyatlardan azad olmuş 60 min manatın hesabına mənfəət 1 milyon 552 min manata yüksəlmişdi.

"Muğanbank"ın əməliyyat mənfəəti 2021-ci illə müqayisədə 2022-ci ildə 11,1 dəfə çox artıb. Artımın səbəbi gəlirlərin artmasıdır. Gəlirlərin artması xərclərin artmasından 15 milyon 70 min manat çox olub.

"Muğanbank"ın cəmi aktivləri 2021-ci illə müqayisədə 2022-ci ildə 12,8% və ya 90 milyon 886 min manat artaraq 31 dekabr 2022-ci il tarixində 799 milyon 338 min manat təşkil edib. Bank 2021-ci ilin sonunda 708 milyon 452 min manat cəmi aktivlərə malik idi.

"Muğanbank"ın kredit portfeli (müştərilərə verilmiş kreditlər) 2021-ci illə müqayisədə 2022-ci ildə 13,1% və ya 52 milyon 710 min manat artaraq 31 dekabr 2022-ci il tarixində 453 milyon 771 min manat təşkil edib. 2021-ci ilin sonunda Bankın kredit portfeli 401 milyon 61 min manata çatmışdı.

Ötən il "Muğanbank"ın istehlak kreditləri portfeli 14 milyon 972 min manat artaraq 44 milyon 587 min manata, biznes kreditləri portfeli 31 milyon 251 min manat artaraq 295 milyon 121 min manata, ipoteka kreditləri portfeli isə 6 milyon 488 min manat artaraq 114 milyon 49 min manata yüksəlib. 

"Muğanbank"ın depozit portfeli  2021-ci illə müqayisədə 2022-ci ildə 23,9% və ya 94 milyon 905 min artaraq 31 dekabr 2022-ci il tarixində 491 milyon 756 min manat təşkil edib. Bank 2021-ci ilin sonunda 396 milyon 851 min manat cəmi depozitlərə malik idi. Ötən il "Muğanbank"da fiziki şəxslərin depozitləri 113 milyon 837 min manat artaraq 394 milyon 655 min manata çatıb.

31 dekabr 2022-ci il tarixində "Muğanbank"ın 103 milyon 164 min manat məcmu kapitala malik olub. Bank 31 dekabr 2021-ci il tarixində 101 milyon 865 min manat məcmu kapitala malik idi.