Neft qiymətləri ABŞ-ın güclü makroiqtisadi statistikası fonunda düşür. İnvestorlar FED-in faizləri artırmağa və onları uzun müddət yüksək səviyyələrdə saxlamağa davam edəcəyindən qorxurlar.

Marja xəbər verir ki, ICE London birjasında Brent markalı neftin fevral fyuçerslərinin qiyməti təxminən 2% düşərək bir barel üçün 77,76 dollar olub. Brent nefti 11 aydan çox müddətdə - yanvarın 3-dən bəri ilk dəfə 78 dollardan aşağı satılıb.

WTI markalı neftin yanvar müqaviləsinin kotirovkaları 1,99% dəyər itirərək bir barel üçün 72,77 dollar təşkil edib.

Neft qiymətləri ABŞ-da güclü makroiqtisadi məlumatlar fonunda düşür. İnvestorlarda, güclü iqtisadi vəziyyət ilə əlaqədar olaraq inflyasiyanın uzun müddət yüksək səviyyələrdə qalacağı və ölkədə davamlı faiz artırılacağı qorxusu yaranıb. Faizlərin daha çox artırılmasının iqtisadi tənəzzülə səbəb olacağı da gözlənilir.

Qiymətlərin düşməsi ABŞ dollarını dəstəkləyən iri ABŞ banklarının gələn il tənəzzülün başlanacağı ilə bağlı xəbərdarlıqları ilə də dəstəklənir. Güclü dollar nefti digər valyuta sahibləri üçün bahalaşdırır və riskli aktivlərə olan iştahı azaldır.

Bazarlar tənəzzül qorxusu fonunda tələbin perspektivlərini də izləməyə davam edir. Analitiklər bildirilər ki, "neft tələbi ilə bağlı proqnozlar pisləşir, çünki faktiki olaraq bütün əsas iqtisadiyyatlarda artımın yavaşladığı müşahidə edilir".

Bazarların əsas narahatlığı bazar ertəsi Qərbin Rusiya neftinə qarşı sanksiyalarının qüvvəyə minməsindən sonra tədarük perspektivləri ilə bağlı qeyri-müəyyənlik ilə bağlıdır. İndi Avropa İttifaqı (Aİ) dəniz yolu ilə daşınan Rusiya neftinin qəbulunu dayandırıb, üstəlik, G7 ölkələri, Avstraliya və Aİ belə neftə bir barel üçün 60 dollar qiymət həddi tətbiq edib.

“Vedomosti” çərşənbə günü yazıb ki, Rusiya hakimiyyəti üç mümkün cavab hazırlayır. Birincisi - məhdudiyyəti dəstəkləyən ölkələrə, o cümlədən vasitəçi ölkələrə satışın tam qadağan edilməsi, ikincisi - qiymət tavanı şərtinin daxil olduğu müqavilələr üzrə ixracın qadağan edilməsi, üçüncüsü isə - indikativ qiyməti - yəni Rusiyanın Urals neftinə Brent neftin qiymətinə bağlı olaraq maksimum endirimi nəzərdə tutur. Endirim müəyyən ediləcək minimal qiymətdən aşağı ola bilməz.