Xəbər verdiyimiz kimi, "OPEC plus" son iclasında hasilatı sabit saxlayıb. Digər tərəfdən, daha çox Çin şəhərinin COVID-19-a qarşı sərt tədbirləri yumşaltmağa başlaması ilə əlaqədar olaraq neft qiymətləri bazar ertəsi yüksəlib. 

Marja xəbər verir ki, iqtisadi mərkəzlər Şanxay və Pekin də daxil olmaqla bir neçə Çin şəhəri, son bir həftə ərzində bəzi məhdudiyyətləri ləğv edib. Hökumət yaxın həftələrdə karantin rejimini daha da yumşaltmağı planlaşdırır.

Çinin dünyanın ən böyük neft idxalçısı statusunu nəzərə alsaq, belə bir ssenari xam əmttə bazarları üçün müsbət olur. Ciddi anti-COVID siyasətləri səbəbindən ölkədə azalan tələb bu il neft bazarlarına satış təzyiqinin əsas mənbəyi olub.

İlk Asiya ticarətində Brent neftinin fyuçersləri 2,3% artaraq barreli 87,38 dollara, Qərbi Texas neftinin fyuçersləri isə 2,1% artaraq barreli 81,66 dollara çatıb. Daha sonra qiymətlər bir qədər geriləyib

Xam neft qiymətləri keçən həftə də yüksəlib, çünki Çin şəhərləri bəzi anti-COVID tədbirlərini azaltmağa başladı.

Çinin, yeni növ koronavirusa rekord səviyyədə gündəlik yoluxma faktları ilə mübarizə apardığını nəzərə alsaq, ölkədə geniş açılma hələ də uzaq bir perspektiv kimi görünür. Lakin bağlanma tədbirlərinin tətbiqi ölkə daxilində etiraz dalğasına səbəb olub və bu, indi hökuməti bəzi məhdudiyyətləri ləğv etməyə məcbur edib.

Analitiklər xəbərdarlıq etdilər ki, Çinin yenidən açılması, xüsusən də karantin tədbirlərinin yumşaldılmasından sonra ölkədə infeksiyaya yoluxanların sayı kəskin arta bilər.

Çinin yenidən açılması ilə bağlı nikbinlik, Neft İxrac Edən Ölkələr Təşkilatı və müttəfiqlərinin (OPEC+) mövcud neft hasilat səviyyələrini qoruyacağına dair qərarının bazara mənfi təsirini böyük ölçüdə əvəzləyib.

Kartel, oktyabr ayında hasilatı gündəlik 2 milyon barel azaltdıqdan sonra ləng tələbatın və yavaşlayan iqtisadi artımın xammal bazarına təsirini qiymətləndirməyə davam edəcəyini bildirib. Yeddilik Qrup, xam neft ixracına 60 dollarlıq qiymət həddi tətbiq etməsindən sonra əsas istehsalçı Rusiya da tədarükünü azaltmaq üzərində düşünür.

Xam neft bazarları ötən həftə OPEC plusun 2022-ci ildə sonuncu iclası ərəfəsində böyük dalğalanmalara imza atmışdı. Kartel indi gələcək istehsalla bağlı qərar vermək üçün 2023-cü ilin fevralında görüşəcək, o zaman Çinin yenidən açılması və qlobal iqtisadi tendensiyalar haqqında daha çox məlumat olacaq. 

Dolların ucuzlaşması da xam neft qiymətlərinin artmasına səbəb olur.  

Bazarlar Federal Ehtiyat Sisteminin (FED) yaxın aylarda daha kiçik faiz artıracağını gözləyir. Mərkəzi Bank gələn həftə 2022-ci ildə sonuncu iclasını keçirəcək.