Ötən cümə günü Bloomberg xəbər verib ki, G7 ölkələri noyabrın 23-də Rusiya neftinin qiymət həddinin hansı səviyyədə təyin olunacağını açıqlamaq niyyətindədirlər. Təklif qəbul edilərsə, razılaşdırılmış qiymət həddi axşam elan oluna bilər. Eyni zamanda, agentliyin həmsöhbətləri qeyd ediblər ki, bu elanın vaxtı da dəyişə bilər.

"BCS Mir Investments"in baş analitiki Ronald Smit bildirib ki, ABŞ və Avropa Rusiya neftinin qiymətini bir barel üçün 50 - 60 dollar səviyyəsində müəyyən edə bilər.

"ABŞ və Avropa bir barel üçün 50-60 dollar arasında bir rəqəm tətbiq etməyə çalışacaq. Lakin biz inanmırıq ki, qiymət tavanı faydalı və ya təsirli bir alət olacaq. Rusiya sadəcə olaraq neft ixracından imtina edəcək, bu da dünya neft qiymətlərinin artmasına səbəb olacaq və tavanı təyin edənlərin xərclərini artıracaq”, - deyə Smit qeyd edib. 

Ekspert əlavə edib ki, qiymət tavanı siyasəti ilə bağlı problemlərdən biri də odur ki, bəzi Qərb siyasətçiləri Rusiyanın neft hasilatını və ixracını davam etdirməli olduğuna inanırlar.

G7 ölkələrinin (Böyük Britaniya, Almaniya, İtaliya, Kanada, ABŞ, Fransa və Yaponiya) maliyyə nazirləri sentyabr ayında sanksiyaların genişləndirilməsi çərçivəsində Rusiya neftinə qiymət məhdudiyyətləri tətbiq etmək niyyətlərini təsdiqləyiblər. Avropa İttifaqı oktyabrın əvvəlində Rusiyaya qarşı səkkizinci sanksiyalar paketini təqdim edib. Paketə Rusiya neftinin dəniz daşınması üçün qiymət tavanının müəyyən edilməsi də daxildir. Qiymət limitinin neft üçün 2022-ci il dekabrın 5-dən, neft məhsulları üçün isə 2023-cü il fevralın 5-dən tətbiq ediləcəyi planlaşdırılır.

Rusiya prezidenti Vladimir Putin Qərbin Rusiyanın enerji resurslarının qiymətlərini məhdudlaşdırmaq fikrini şərh edərkən bəyan edib ki, Rusiya qiymət tavanını qəbul edən ölkələrə neft satmayacaq. Baş nazirin müavini Aleksandr Novak da, Rusiyanın, qiymət tavanı təyin edən ölkələrə neft ixrac etməyəcəyini bildirib. Onun sözlərinə görə, bu cür məhdudiyyətlər bazar mexanizminə müdaxilədir və Rusiya bazar şərtləri ilə işləyən ölkələr ilə əməkdaşlıq edəcək.