Çərşənbə axşamı qlobal birjalarda qızılın qiyməti 2%-dən çox bahalaşıb. Bazarlar dolların ucuzlaşmasına və ABŞ dövlət istiqrazlarının gəlirliliyinin düşməsinə reaksiya verir.

Marja xəbər verir ki, Nyu-York Comex birjasında qızılın dekabr fyuçerslərinin qiyməti 36,55 dollar və ya 2,17% artaraq 1 troya unsiyası üçün 1717,05 dollar təşkil edib (Bakı vaxtı ilə saat 21:20-yə olan məlumat). Göstərici oktyabrın əvvəlindən bəri ilk dəfə bir unsiya üçün 1700 dollar həddini üstələyir. Dekabr gümüş fyuçersləri 3,26% artaraq bir unsiya üçün 21,6 dollar olub.

Dollar nə qədər ucuz olsa, qızılı başqa valyutada almaq bir o qədər əlçatan olur ki, bu da bu qiymətli metalın qiymətinin artımını təmin edir.

On illik ABŞ dövlət istiqrazlarının gəliri də ABŞ tənzimləyicisinin siqnallarına cavab verir. Əvvəlki ticarət günü ilə müqayisədə göstərici 4,214%-dən 4,159%-dək azalıb. ABŞ dövlət istiqrazları “etibarlı” aktiv kimi qızıla alternativdir.

Ötən çərşənbə günü ABŞ Federal Ehtiyat Sistemi (FED) uçot dərəcəsini 0,75 bənd artıraraq illik 3,75-4%-ə çatdırıb. FED ardıcıl dördüncü dəfə faizləri bu sürətlə (0,75 bənd) artırıb və əlavə artımların məqsədəuyğun ola biləcəyini qeyd edib. Bununla belə, bir çox investor FED-in aqressiv siyasətinin "zirvəsinin" arxada qaldığını güman edir. CME Group-un məlumatına görə, analitiklərin 56,8%-i dekabrda faizin 0,50 bənd artırılacağını (0,75 ilə müqayisədə bir qədər qədər yavaş) gözləyirlər ki, bu da illik 4,25-4,5%-ə qədər artım deməkdir.

Dollar, ABŞ-ın inflyasiya məlumatlarından əvvəl avro qarşısında ucuzlaşıb

Çərşənbə axşamı günü axşam dollar avro və yen qarşısında ucuzlaşır. Bazarlar ABŞ-da istehlak qiymətləri (inflyasiya) ilə bağlı məlumatları gözləyirlər.

Avronun dollara nisbətdə məzənnəsi 1,0095 dollara yüksəlib (Avro bahalaşıb, dollar ucuzlaşıb). Dollar yen qarşısında isə 146,62 yendən 145,37 yenə düşüb. Dollar indeksi isə (ABŞ-ın ticarət tərəfdaşları olan altı ölkənin valyutalarından ibarət səbətə nisbətdə məzənnə) 0,58% azalaraq 109,48 bənd təşkil edib.

Bazarlar cümə axşamı günü ABŞ-da istehlak qiymətləri ilə bağlı məlumatı gözlədiyi üçün dolların avro və yen qarşısında dəyəri azalıb. Analitiklər hesab edirlər ki, ölkədə illik inflyasiya oktyabrda bir ay əvvəlki 8,2%-dən 8%-ə enib.

İnflyasiya yavaşlarsa ABŞ Federal Ehtiyat Sistemi (FED) pul siyasətinin sərtləşdirilməsinin (faizin artırılmasının) sürətini azalda bilər ki, bu da öz növbəsində dollar üçün mənfi olur.