Rusiya oktyabr ayında Hindistanın ən böyük neft tədarükçüsü olub.

Marja.az-ın məlumatına görə, Vortexa sənaye araşdırma firmasının analitikləri bildiriblər ki, Rusiya oktyabr ayında bu sahədə ənənəvi liderlər olan Səudiyyə Ərəbistanı və İraqı keçərək Hindistanın ən böyük neft tədarükçüsü olub.

Oktyabr ayında Rusiya Hindistana gündə 946 min barel neft təhvil verib ki, bu da bir ayda ən yüksək göstəricidir və ya Hindistana bütün xam neft idxalının 22%-ni təşkil edir. Eyni zamanda, oktyabrda İraqın payı tədarüklərin 20,5%-i, Səudiyyə Ərəbistanının payı 16%-i səviyyəsində olub.

Şirkətin analitiklərinin fikrincə, oktyabrda Hindistanın xam neft idxalının ümumi həcmi sentyabr ayı ilə müqayisədə 5%, Rusiyadan idxal isə 8% artıb. 

Eyni zamanda, şirkətin analitikləri qeyd edirlər ki, Rusiyadan Hindistana neft idxalı dekabr ayından etibarən Qərbin Rusiya neftinə təklif etdiyi qiymət həddi ilə bağlı yarana biləcək çatdırılma məhdudiyyətləri səbəbindən yavaşlaya bilər.

Avropa ittifaqının dekabrın 5-də qüvvəyə minəcək qadağasından sonra Rusiyanın neft tədarükünün bu səviyyədə saxlanılıb-saxlanamayacağına dair çoxlu qeyri-müəyyənlik qalmaqdadır.

Oktyabrın əvvəlində Avropa İttifaqı Rusiyaya qarşı səkkizinci sanksiyalar paketini təqdim edib ki, bu da Rusiya neftinin üçüncü ölkələrə dəniz yolu ilə daşınması üçün qiymət tavanının müəyyən edilməsi üçün qanunvericilik bazasını özündə əks etdirir. Qiymət limitinin neft üzrə 2022-ci il dekabrın 5-dən, neft məhsulları üçün isə 2023-cü il fevralın 5-dən tətbiq ediləcəyi planlaşdırılır. Qazın qiymətinin yuxarı həddinin tətbiqi müzakirə olunur. Qərb ölkələri Rusiyanın neft və qaz ixracından əldə etdiyi gəlirləri məhdudlaşdırmaq üçün müxtəlif tədbirləri müzakirə etməkdə davam edir.

ABŞ Xəzinədarlığı bir barel üçün 40-60 dollar diapazonunda qiymət tavanının tətbiqini nəzərdə tutur.