31 oktyabr 2022-ci il tarixində Mərkəzi Bankın Naxçıvan Muxtar Respublikası İdarəsində “Bank Savadlılığı Layihəsi” çərçivəsində 31 oktyabr Beynəlxalq Əmanət Günü ilə bağlı tədbir keçirilmişdir.

İdarənin yaydığı məlumatda bildirilir ki, tədbirə bank filial və şöbələrinin nümayəndələri və Naxçıvan Dövlət Universiteti, Naxçıvan Universiteti, Naxçıvan Müəllimlər İnstitutu, və Naxçıvan Dövlət Texniki Kollecinin tələbələri cəlb olunmuşlar.

Tədbiri giriş sözü ilə İqtisadi təhlil və statistika şöbəsinin aparıcı mütəxəssisi Mərhəmət Bayramov açaraq tədbirin keçirilməsində əsas məqsədin tələbələrin bank savadlılığının artırılması, həmçinin bank məhsul və xidmətləri ilə bağlı əməliyyatlarda daha çevik və düzgün qərarların verilməsini dəstəkləmək və onlarda bank sektoruna inamı gücləndirməkdən ibarət olduğunu bildirmişdir.

Tədbir zamanı iştirakçılara Mərkəzi Bankın Bank Savadlılığı Komandasının üzvləri Mərhəmət Bayramov və Samil Quliyev tərəfindən əmanət anlayışı, onun formaları, əmanətin tarixi və faydaları, qənaətin məqsədi, qənaət vərdişləri, şəxsi və ailə büdcəsinin idarə olunması, muxtar respublikada banklar tərəfindən cəlb olunan əmanətlərin həcmi, əmanətlər üzrə faiz bölgüsü, əmanətlərin sığortalanması  və s. mövzular elektron slaydlarla tədris olunmuş və iştirakçıların mövzu ətrafında sualları ətraflı cavablandırılmışdır.

Bununla yanaşı, tədbir zamanı tələbələrə banklardan cəlb olunan nümayəndələr tərəfindən bankların bank-maliyyə fəaliyyətini əks etdirən müxtəlif bukletlər paylanılmış və onlara banklarda mövcud olan bank məhsul və xidmətləri barədə geniş məlumat verilmişdir.

Sonda iştirakçılar arasında oyun əsaslı tədris platforması olan “Kahoot” sistemi vasitəsilə yarış keçirilmiş və qalib şəxslərə komandanın üzvü Ceyhun İbrahimov tərəfindən oxunması zəruri olan kitablar, bank savadlılığının artırılmasına dəstək verici vəsaitlər, bloknotlar və başqa hədiyyələr təqdim edilmişdir.

Mərkəzi Bankın Naxçıvan Muxtar Respublikası İdarəsi “Bank Savadlılığı Layihəsi” çərçivəsində əhalinin bank sahəsində bilik və bacarıqlarının artırılması istiqamətində bundan sonra da silsilə tədbirləri davam etdirəcəkdir.