"Premium Bank" ASC 2022-ci ilin 9 ayını (yanvar - sentyabr) 4 milyon 12 min manat xalis mənfəət ilə başa vurub. Bank ötən ilin eyni dövründə 6 milyon 999 min manat xalis mənfəət əldə etmişdi. Ötən ilin yanvar-sentyabr ayında xalis mənfəət mümkün zərərlər üçün yaradılan məqsədli ehtiyatlardan qayıtmış vəsaitin hesabına idi. 2022-ci ilin xalis mənfəti isə Bankın cari fəaliyyətindən qaynaqlanır. 

Marja.az xəbər verir ki, 2022-ci ilin 9 ayında "Premium Bank"ın cəmi əməliyyat gəlirləri 35 milyon 847 min manat, cəmi əməliyyat xərcləri 28 milyon 123 min manat, gəlirlər xərcləri üstələdiyindən əməliyyat mənfəəti 7 milyon 724 min manat təşkil edib. Bank mümkün zərərlər üçün yaradılan məqsədli ehtiyatlara 3 milyon 712 min manat ayırdığından cari ilin yanvar-sentyabr dövrünü 4 milyon 12 min manat xalis mənfəət ilə bağlayıb.

Müqayisə üçün qeyd edək ki, 2021-ci ilin 9 ayında "Premium Bank"ın cəmi əməliyyat gəlirləri 34 milyon 898 min manat, cəmi əməliyyat xərcləri 35 milyon 846 min manat, xərclər gəlirləri üstələdiyindən əməliyyat zərəri 948 min manat təşkil etmişdi. Mümkün zərərlər üçün yaradılan məqsədli ehtiyatlardan qayıtmış 7 milyon 946 min manatın hesabına əməliyyat zərəri bağlanmış və bank həmin dövü 6 milyon 999 min manat xalis mənfəət ilə başa vurmuşdu.

"Premium Bank" ASC-nin cəmi əməliyyat gəlirləri 2021-ci ilin 9 ayı ilə müqayisədə 2022-ci ilin 9 ayında 948 min manat artmasına qarşılıq, cəmi əməliyyat xərcləri 7 milyon 724 min manat azalıb. Beləliklə, "Premium Bank" həm cəmi əməliyyat gəlirlərini artırması, həm də xərclərini azaltması hesabına əməliyyatını zərərdən mənfəətə keçirib.

BANK BÖYÜYÜB

2021-ci ilin sonu ilə müqayisədə "Premium Bank"ın cəmi aktivləri 41 milyon 795 min manat və ya 5,5% artaraq 30 Sentyabr 2022-ci il tarixində 802 milyon 134 min manat təşkil edib. O cümlədən, cəmi aktivlərin 477 milyon 993 min manatını müştərilərə verilmiş kreditlər təşkil edib.

Cari ilin 9 ayı ərzində "Premium Bank"da cəmi depozitlər 57 milyon 413 min manat və ya 11% artaraq 575 milyon 773 min manata çatıb. 30 Sentyabr 2022-ci il tarixində "Premium Bank" ASC 174 milyon 910 min manat məcmu kapitala malik olub ki, bu da minimal məcmu kapital tələbindən 3,5 dəfə çoxdur.