"Bu dəstək Unibankın devalvasiyasının təsirindən çıxmasına kömək edəcək" 

AYİB və DEG Azərbaycandakı digər mövcud maraqlı tərəflərlə birgə “Unibank Azərbaycan” ın təkrar kapitallaşdırılmasına dəstək göstərir

Avropa Yenidənqurma və İnkişaf Bankı (AYİB) və KfW  Bankengruppe  Banklar Qrupunun tabe təşkilatı olan DEG (Deutsche Investitions- und Entwicklungsgesellschaft mbH) Azərbaycanın aparıcı banklarından biri olan “Unibank”ın nizamnamə kapitalını ümumilikdə 49 milyon AZN-dək (ABŞ dolları ilə ekvivalenti) artırmaq üçün güclərini birləşdirmişlər. Bu barədə AYİB-in Bakı Ofisindən “Marja”ya daxil olmuş məlumatda deyilir.

AYİB nizamnamə kapitalının artmasına “Unibank”dakı mövcud hesabının 9 milyon ABŞ dollarınadək olan hissəsini yeni adi səsli səhmlərə çevirməklə və beləliklə, öz payını 22,0 faizə çatdırmaqla töhfə vermişdir.

DEG isə bankdakı hesabının 15 milyon ABŞ dollarınadək olan hissəsini yeni adi səsli səhmlərə çevirmiş və beləliklə, öz payını 27,6 faizə çatdırmışdır.

“Unibank”ın əsas səhmdarı Eldar Qəribov 10 milyon AZN dəyərində yeni adi səhmlərə abunə olmuş və beləliklə, digər yerli səhmdarlarla birlikdə bankda nəzarətçi payını qoruyub saxlamışdır.

“AYİB Azərbaycandakı uzunmüddətli tərəfdaşı olan “Unibank”a onun kapital bazasının gücləndirilməsində iştirak etməklə dəstək göstərir. Bu dəstək bankın yerli valyuta olan manatın devalvasiyasının təsirindən çıxmasına kömək edəcək və bankın yerli iqtisadiyyatı yenidən kreditləşdirməyə başlamasına imkan verəcək” – AYİB-in Bakı Ofisinin rəhbəri xanım İvana Duarte belə deyir.

AYİB Azərbaycandakı aparıcı institusional investorlardan biridir. Ölkədə fəaliyyətə başladığı vaxtdan etibarən AYİB maliyyə, korporativ, infrastruktur və enerji sahələrində 161 layihəyə 2,8 milyard ABŞ dollarından artıq investisiya yatırmışdır. Həmin investisiyaların 68 faizi özəl sektora yatırılmışdır.