Azərbaycanlı gənc Ramil Nəcəfov yeni avtomobil modelinin dizaynını hazırlayıb.

Ramil hələ ötən il ərsəyə gətirdiyi layihəni Azərbaycanın Vətən müharibəsindəki şanlı Qələbəsinə həsr etmişdi və avtomobil modelinə “Zəfər” adı vermişdi. Həvəskar dizayner bu dəfə “Zəfər” avtomobil modelinin hibrid versiyasının dizaynını tamamlayıb.

Avtomobilin 3D formatda dizaynını işləyən Ramil qeyd edib ki, yeni layihənin hazırlanmasında estetik və modern üslubdan, eləcə də müasir texnologiya və vizual səhnələrdən istifadə olunub.

Əslən Şəkidən olan Ramil bu avtomobili “Zhafar Hyibrit Electric” adlandırır. Onun sözlərinə görə, bu model avtomobil ağıllı aerodinamikaya sahibdir və elektromobil texnologiyalarında yeni standartlar yarada bilər: “Bu avtomobildə gələcəyin idarəetmə imkanları tətbiq edilə bilər. Ətraf mühitə sıfır tullantı, ekologiya dostu və mükəmməl dinamika. Naviqasiya sisteminə enerji doldurma məntəqələrinin yerini göstərən “Apple Car Play”, “Android Auto” və “TomTom LIVE” xidmətləri daxil etmək mümkündür. Bircə barmaq toxunuşu ilə smartfona naqilsiz enerji yükləmək də olar”.

Yeni avtomobil “Həyat üçün əlavə güc” şüarını özündə əks etdirir. Ramil deyir ki, “Zhafar Hyibrit” modelini hələlik iki modifikasiyada yığmaq olar. 58 və 73 kilovat-saat tutumu olan batareya ilə təchiz edilən modifikasiyaların yürüş məsafəsi, müvafiq olaraq, 354 və 450 kilometr ola bilər. Ekspress yükləmə sayəsində enerji ehtiyatının 80 faizini 18 dəqiqədə bərpa etmək mümkündür. 30 faiz enerji yüklənməsi 100 kilometrə qədər yürüş ehtiyatını təmin edəcək. Tam yüklənmiş enerji ilə sürətlə 100 kilometr, normal rejimdə 350-400 kilometr məsafə qət etmək olar. Avtomobil saatda 180 kmh maksimal sürət yığa bilər.

“Ümumi dizayndan əlavə, radiator barmaqlığına yerləşdirilmiş aktiv hava pərləri aerodinamikanın imkişafına dəstək verir. Başqa bir detal isə 3 halqalı dairə şəklində LED gündüz fənərləridir. Zərif və aerodinamik dizayn edilmiş yan güzgülər isə avtomobilin hərəkəti zamanı küləyin səsini azaldır. Avtomobilin disklərinin dizaynında diqqət çəkən maraqlı bir məqam isə təkər pərlərinin yarısı küləyin sürətə təsirini azaltmaq üçün plastik örtüklə örtülüb. Bu məqam eyni seqmentdə olan heç bir avtomobildə nəzərə alınmır. Hansı ki, yanacaq sərfiyyatı baxımından çox önəmlidir”, - deyə o əlavə edib.

Ramil Nəcəfovun sözlərinə görə, avtomobilin təhlükəsizlik sistemi kritik nöqtələrdə gücləndirilərək daha effektiv formaya gətirilib. Yeddi hava yastığı isə bu sistemi tamalayır.

Əlbəttə, bu layihə təkmilləşdirilə bilər. Bunun üçün isə gənc dizaynerə dəstək lazımdır. O, bu layihəni işləməklə avtomobil istehsalı ilə məşğul olan şirkətlərin, investorların diqqətini çəkmək istəyir. Gənc dizayner avtomobil istehsalçıları ilə əməkdaşlıq etmək arzusundadır.

Onun ən böyük arzusu isə Azərbaycana məxsus avtomobil modelinin istehsalını reallaşdırmaqdır. Ramil gələcəkdə bu sahədə təhsilini və təcrübəsini artırmaq barədə də düşünür. O, “World design” (“Dünya dizayn”) sərgisində iştirak etmək, Azərbaycanı dünya avtomobil istehsalçıları arasında tanıtmaq niyyətindədir.

© Aəzrtac