İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti antiinhisar qanunvericiliyinin pozulması hallarının qarşısının alınması istiqamətində müraciətlərin araşdırılması ilə bağlı mütəmadi tədbirlər həyata keçirir.

“Delivery Azerbaijan” MMC tərəfindən Dövlət Xidmətinə “Bolt Services AZ” MMC-nin qanunsuz üsullarla digər bazar subyektlərini bazardan çıxarmaqla haqsız rəqabətə yol verdiyi barədə müraciət daxil olub.

Bununla bağlı müvafiq araşdırma aparılıb və “Bolt Services AZ” MMC haqqında antiinhisar qanunvericiliyinin pozulması əlamətləri üzrə iş qaldırılıb.

İşə baxılması zamanı “Bolt Services AZ” MMC-nin onunla eyni bazarda fəaliyyət göstərən və ya həmin bazara daxil olmaq istəyən digər bazar subyektlərinin təsərrufat qərarlarının qəbul edilməsinə qanunsuz təsir göstərdiyi və bununla da “Haqsız rəqabət haqqında” Qanunun tələblərini pozduğu müəyyən edilib.

Dövlət Xidməti tərəfindən işə baxılmanın nəticəsi olaraq yol verilmiş haqsız rəqabət hallarının qarşısının alınması və aradan qaldırılması məqsədilə “Bolt Services AZ” MMC-yə icrası məcbur olan göstəriş verilib, habelə haqsız rəqabətə yol verdiyinə görə müəssisə barədə maliyyə sanksiyası tətbiq olunub.

Qeyd edək ki, “Bolt Services AZ” MMC haqqında iş “Delivery Azerbaijan” MMC-nin (“189 Delivery”) müraciəti əsasında qaldırılmışdı. “Bolt Services AZ” MMC tərəfindən göstərilən “Bolt Food” tətbiqi üzərindən çatdırılma xidmətlərinə əsassız və qanunsuz vasitələr hesabına endirimlər etməklə rəqibin üzərində əsassız üstünlük qazanmaq məqsədilə onun təsərrüfat qərarlarının qəbul edilməsinə və icrasın qanunsuz vasitələrlə təsir göstərilməsi əlamətləri olduğu iddia olunurdu.

"Bolt", bir vaxtlar "Taxify" kimi tanınan, Avropa, Asiya və Afrika ölkələrində inkişaf edən nəqliyyat platformasıdır. “Bolt Services AZ” MMC Azərbaycanda "Bolt"un təmsilçisidir.