Aqrar Sığorta Fondu ölkədə ilk dəfə olaraq nar bağlarını sığorta etməyə başlayıb. Əkin sahələrində olduğu kimi, nar bağları üzrə də sığorta haqqının yarısını fermerlərə dəstək üçün dövlət ödəyir.

Aqrar sığorta nar bağlarını çoxsaylı risklərdən qoruyur. Belə ki, təminat verilən rislər sırasına dolu, sel-su basma, yanğın, qasırğa, fırtına, normadan artıq yağan qar, üçüncü şəxslərin hərəkətləri və sair hallar aiddir. Nar bağlarının sahibləri onu baza sığorta zərfi ilə yanaşı, ayrıca olaraq donvurma (şaxtavurma) halından, bitki xəstəlikləri və zərərvericilərdən, doluvurmadan keyfiyyət itkisi riskindən, eləcə də tinglərin və ağacların özünü ayrı-ayrılıqda sığorta etmək imkanlarına malikdirlər.

Son ilin məlumatına əsasən Azərbaycanda nar bağlarının sahəsi 22,7 min hektar olmuşdur və mövcud nar bağlarının 21,2 min hektarı, yəni 93,4%-i barverən yaşdadır. Ölkə üzrə cəmi nar bağlarının 84,3 %-i ənənəvi, 15,7%-i isə intensiv bağlardır.

Respublikada nar bağlarının 16,1%-i Göyçay, 14,1%-i Kürdəmir, 10,6%-i Ağsu, 8,5%-i Ucar və 6,2%-i Saatlı olmaqla, ümumilikdə 55,5%-i 5 rayonun payına düşüb. Belə ki, ölkə üzrə nar istehsalı 2015-ci ilə nisbətən 15,2%, 2019-cu ilə nisbətən isə 0,6% artaraq 182,1 min ton olub. Nar istehsalının 59,3 %-i 5 rayonun payına düşüb. Əsas istehsalçı rayonlar: Göyçay-20,9%, Kürdəmir-17,3%, Sabirabad-7,5%, Şəmkir-7,3%, Hacıqabul-6,4% paya malikdirlər.

Azərbaycanda geridə qoyduğumuz ilə nisbətən narın məhsuldarlığı 0,2% artaraq 85,8 sent/ha olub. Narın əsas istehsalçı rayonları olan Şəmkir, İmişli, Göyçay, Sabirabad, Kürdəmir və Hacıqabul rayonlarında məhsuldarlıq göstəricisi ölkə üzrə orta göstəricidən yüksəkdir.

Cari ildə Azərbaycana nar idxalı əvvəlki ilə nisbətən 24,3% azalaraq 23,1 ton olub. 2020-ci ildə ölkədən nar ixracı isə ən yüksək həddə çataraq 19,4 min ton olub. Bu göstərici mövcud sahədə atılmış uğurlu addımların nəticəsidir.

Nar bağlarının baza sığorta zərfi ilə sığorta tarifi ölkənin ayrı-ayrı regionları üzrə fərqlidir və 1,62%-3,08% arasında dəyişir. Bu bitkinin ən çox əkildiyi Aran bölgəsində sığorta tarifi 1,65% təşkil edir. Hesablanan sığorta haqqının 50%-ni fermerə dəstək üçün dövlət ödəyir.

Misal: Məhsuldarlığı 85 sentner, 1 sentnerin qiyməti 100 manat, yəni ümumilikdə 8 500 manatlıq məhsul gözləniən nar bağının baza zərfi üzrə sığortalanması ölkənin regionlarından asılı olaraq 69-131 manat arasında dəyişir. Fermer bu məbləğin yalnız yarısını – 34,5-65,5 manatını ödəyir, qalan hissəni dövlət ödəyir. Sığorta hadisəsi nəticəsində sahədəki məhsul tamamilə itirilərsə, femerə 7 650 manatadək sığorta ödənişi edilə bilər.

Aqrar sığortanın əhatə etdiyi meyvə məhsullarının sığorta şərtləri və tarifləri ilə Aqrar Sığorta Fondunun rəsmi internet səhifəsində «Bitkiçilik məhsulları» bölməsində ətraflı tanış olmaq mümkündür.

Fermerlər əkin sahələrinin sığortası üzrə sığorta haqlarını və ödənişləri Aqrar Sığorta Fondunun rəsmi internet səhifəsində «Bitkiçilik kalkulyatoru» bölməsində hesablaya bilərlər.

Əlavə məlumatları ASF-nin sosial şəbəkə hesablarını izləməklə və 1651 qısa nömrəsi ilə əlaqə saxlamaqla əldə etmək olar.