05.05.2022/ 10:57 - Sahibkarlığın İnkişafı Fondunda Azərbaycan Quş əti, Yumurta İstehsalçıları və İxracatçıları Assosiasiyasının üzvləri ilə görüş keçirilib.

Fonddan Marja-ya daxil olmuş məlumatda bildirilir ki, görüşdə quş əti istehsalı sektorunda mövcud vəziyyət və istehsalçıların maliyyə mənbələrinə çıxış imkanları müzakirə olunub.

Assosiasiya üzvləri yem bitkilərinin nisbətən ucuz olduğu yığım mövsümünün yaxınlaşdığını nəzərə alaraq, yem ehtiyatının yaradılması məqsədilə güzəştli maliyyə dəstəyinə ehtiyac olduğu bildiriblər.

Sahibkarlığın İnkişafı Fondunun İdarə Heyətinin sədri vəzifəsini icra edən Osman Xaliyev ölkədə antiinflyasiya tədbirlərinin gücləndirilməsi ilə bağlı minimum istehlak səbətinin tərkibində əsas ərzaq məhsullarının tədarükü və emalı, aqrar emal ilə məşğul olan mikro, kiçik və orta sahibkarlara dəstək göstərilməsi məqsədilə Azərbaycan Respublikası Nazirlər Kabinetinin 4 aprel tarixli Qərarı barədə məlumat verib. Bildirilib ki, mexanizm üzrə minimum istehlak səbətinin tərkibində əsas ərzaq məhsullarının tədarükü və emalı, aqrar emalla məşğul olan KOB subyektlərinə 2022-ci ildə verilən və məbləği hər bir sahibkarlıq subyekti üzrə 3 milyon manatadək olan kreditlərin faizinin 10% bəndinədək hissəsi 12 ayadək subsidiyalaşdırılacaqdır.

Görüşdə həmçinin minimum istehlak səbətinin tərkibində əsas ərzaq məhsullarının tədarükü və emalı, aqrar emalla məşğul olan iri sahibkarlıq subyektlərinin də güzəştli maliyyə resurslarından istifadə edə bilməsi üçün təkliflərin hazırlandığı qeyd edilib.

XXX

Bir müddət öncə Azərbaycan Quş əti, Yumurta İstehsalçıları və İxracatçıları Assosiasiyası(APEPEA) İqtisadiyyat Nazirliyi yanında Sahibkarlığın İnkişafı Fondunun İdarə Heyəti sədrinin vəzifələrini icra edən Osman Xalıyevə müraciət edərək, quş əti istehsalçılarının yem tədarükünə güzəştli kredit dəstəyinin verilməsini xahiş etmişdi.

APEPEA-nın İctimaiyyətlə əlaqələr və analitika departamentinin yaydığı məlumata görə. Aprelin 29-da Fondun İdarə Heyəti sədrinin vəzifələrini icra edən Osman Xalıyevlə APEPEA rəhbərliyi və üzvləri arasında görüş keçirilib.

Görüşdə quş əti istehsalçıları qarşıdan yem bitkilərinin nisbətən ucuz olduğu yığım mövsümünün gəldiyini, onların bu fürsətdən istifadə edərək 6 aylıq yem ehtiyatı yaratmaq istəklərini Fond rəhbərinin diqqətinə çatdırıblar.

APEPEA İdarə Heyətinin sədri Mürvət Həsənlinin verdiyi məlumata görə, istehsalçılar 6 aylıq yem ehtiyatının 2 ayının qarşılanması üçün Fondun güzəştli kredit ayırmasını təklif ediblər:

“Bütün istehsal müəssisələrinin ümumilikdə 40 milyon manata yaxın vəsaitə ehtiyacı var. Biz bu məbləği bir il ərzində geri qaytara bilərik. Osman müəllim Nazirlər Kabinetinin aprelin əvvəlində imzaladığı 109 saylı qərarında minimum istehlak səbətinə daxil olan ərzaq məhsullarının ehtiyatının yaradılmasında iştirak edən mikro, kiçik və orta sahibkarlıq subyektlərinin götürdükləri kreditlərin faizlərinin 10 faizinin dövlət tərəfindən qarşılanacağını bildirdi. Quş əti və yumurta istehsalı fabriklərinin əksəriyyəti iri sahibkarlıq subyektləri olduqları üçün bu qərarın onlara şamil olunması mümkün deyil. Osman müəllim qeyd etdi ki, bu gün(aprelin 29-da) Fondun Müşahidə Şurasının iclası keçiriləcək və orada bu məsələni müzakirəyə təqdim edəcək. Təəssüratımız belədir ki, dövlətimiz bizə gözlədiyimiz dəstəyi verəcək”.