“Atəşgah Həyat Sığorta Şirkəti” ASC 2021-ci ili 6 milyon 432 min manat xalis mənfəət ilə başa vurub. Xatırladaq ki, “Atəşgah Həyat Sığorta Şirkəti” 2020-ci ili 4 milyon 986 min manat xalis mənfəət ilə bağlamışdı. Beləliklə, 2020-ci illə müqayisədə 2021-ci ildə  “Atəşgah Həyat Sığorta Şirkəti”nin xalis mənfəəti 29% artıb. Mənfəətin artması yığımların artması, eyni zamanda sığorta ödənişlərinin azalması hesabınadır.

Marja.az şirkətin maliyyə hesabatlarına istinadən xəbər verir ki, ötən il “Atəşgah Həyat Sığorta”nın cəmi əməliyyat gəlirləri 49 milyon 503 min manat, cəmi əməliyyat xərcləri 41 milyon 464 min manat təşkil edib. Müqayisə üçün qeyd edək ki, 2020-ci ildə Şirkətin cəmi əməliyyat gəlirləri 73 milyon 878 min manat, cəmi əməliyyat xərcləri 67 milyon 646 min manat təşkil etmişdi.

2020-ci ildə “Atəşgah Həyat Sığorta”nın əməliyyat gəlirinin bir hissəsi ehtiyatdan azad olmuş vəsaitin hesabına formalaşmışdı. Belə ki, ehtiyatdan azad olmuş 27 milyon 887 min manat gəlirə əlavə edilmişdi. Ötən il sığorta ehtiyatından azad olmuş 2 milyon 308 min manat gəlirə əlavə edilib. Ehtiyatdan azad olmuş vəsaitin və investisiya gəlirlərinin azalması ilə əlaqədar olaraq Şirkətin cəmi əməliyyat gəlirləri də azalıb.

Həmçinin oxu

Bu sığorta şirkətinin xalis mənfəəti 10 dəfədən çox azalıb

YIĞIMLARI ARTIB

2020-ci ildə "Atəşgah Həyat Sığorta"nın hesabladığı sığorta haqları 41 milyon 839 min manat ikən, 2021-ci ildə 44 milyon 194 min manata yüksəlib.

2021-ci ildə "Atəşgah Həyat Sığorta"nın investisiya gəlirləri 2 milyon 389 min manat təşkil edib (2020-ci ildə 4 milyon 80 min manat təşkil etmişdi)

SIĞORTA ÖDƏNİŞLƏRİ 2 DƏFƏYƏ YAXIN AZALIB 

"Atəşgah Həyat Sığorta"nın sığorta ödənişləri isə 2020-ci ildə 60 milyon 149 min manat ikən, 2021-ci ildə 31 milyon 149 min manat təşkil edib.

Qeyd edək ki, Azərbaycanda ilk həyat sığortası şirkəti olan “Atəşgah Həyat” Sığorta Şirkəti 1998-ci ilin mart ayında təsis edilmiş və  həyat sığortası üzrə xidmətləri təqdim etmək üçün 2008-ci ilin dekabr ayında qeydiyyatdan keçmişdir. Şirkət həyat sığortası üzrə həyatın müddətli sığortası, yığım sığortası, kredit həyat sığortası, istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari həyat sığortası və sağalmaz xəstəliklərdən sığorta xidmətlərini təklif edir.