Azərbaycandakı bank kartlarının 65%-i təmassız ödənişləri dəstəkləyir

Azərbaycandakı bank kartlarının 65%-i təmassız ödənişləri dəstəkləyir

Azərbaycandakı bank kartlarının 65%-i təmassız ödənişləri dəstəkləyir

Ölkədə nağdsız ödənişlərin aparılmasında bank kartları əsas ödəniş aləti kimi istifadə olunur.

Marja Mərkəzi Banka istinadən xəbər verir ki, 2021-ci ildə ölkədə nağdsız ödənişlərin həcmi əhəmiyyətli dərəcədə artmış, təmassız texnologiyaların, elektron ticarətin istifadəsi genişlənmişdir. Belə ki, 01.01.2022-ci il tarixinə dövriyyədə olan ödəniş kartlarının sayı 11.5 mln ədəd təşkil etmiş və bu kartların 65%-i təmassız ödənişləri dəstəkləmişdir.

2020-ci il ilə müqayisədə ödəniş kartlarının sayı 20%, o cümlədən təmassız kartların sayı 2 dəfə artmışdır.

Emissiya edilən ödəniş kartlarının 88%-ni (10.1 mln. ədəd) debet kartlar, 12%-ni (1.4 mln. ədəd) isə kredit kartları təşkil etmişdir.

2021-ci il ərzində ölkə daxilində ödəniş kartları ilə aparılmış əməliyyatların ümumi həcmi 2020-ci il ilə müqayisədə 29% artaraq 38 mlrd. manat,o cümlədən nağdsız ödənişlərin həcmi 79.6% artaraq 11.5 mlrd. manat olmuşdur.

Ödəniş kartları ilə aparılmış ölkədaxili əməliyyatlarda nağdsız hesablaşmaların xüsusi çəkisi 2020-ci il ilə müqayisədə 9.1% bəndi yüksələrək 31.8%- ə bərabər olmuşdur.

Ölkədə bank kartları ilə aparılan nağdsız ödənişlərin böyük hissəsi elektron ticarət əməliyyatlarının payına düşmüşdür. 2021-ci ilərzində elektron ticarət əməliyyatlarının sayı 2020-ci il ilə müqayisədə 57.5% artaraq 110 mln. ədəd, həcmi isə 81% artaraq 7.5 mlrd. manat olmuşdur.

Təsərrüfat subyektlərində 2021-ci il ərzində POS-terminal vasitəsilə aparılan nağdsız əməliyyatların sayı 2020-ci il ilə müqayisədə 2.2 dəfə artaraq 105 mln. ədəd, həcmi isə 80% artaraq 3.9 mlrd. manat olmuşdur. O cümlədən, 2021-ci il ərzində POS-terminallarla aparılan təmassız ödənişlərin sayı 2020-ci il ilə müqayisədə 3.8 dəfə artaraq 71.8 mln. ədəd, həcmi isə 5.2 dəfə artaraq 2.6 mlrd. manat olmuşdur.

01.01.2022-ci il tarixinə ölkədə quraşdırılmış bankomatların sayı 2970 ədəd olmuşdur və son 1 il ərzində bankomatların sayında 6.9% artım müşahidə edilmişdir.

01.01.2022-ci il tarixinə ölkədə 61 178 POS-terminal dövriyyədə olmuşdur və son 1 il ərzində müvafiq göstərici 6.7% yüksəlmişdir. Təmassız ödənişləri qəbul edən POSterminalların sayı isə müvafiq dövr ərzində 28.5% artaraq 43 920 ədəd təşkil etmişdir.

2021-ci ilin sonuna banklar tərəfindən quraşdırılmış ödəniş terminallarının sayı 2020-ci ilin sonu ilə müqayisədə 4.3% azalaraq 1845 ədəd təşkil etmişdir.