Mobil proqramlar öz tərtibatçıları üçün mühüm gəlir kanalı olmağa davam edir.

Marja.az xəbər verir ki, Apple tərəfindən açıqlanan məlumatlara görə, iOS tərtibatçıları 2021-ci ildə App Store-dan cəmi 60 milyard dollar, 2008-ci ildən bəri  isə 260 milyard dollar gəlir əldə ediblər.

Apple-ın proqram mağazası olan App Store 2008-ci ildə istifadəyə verilib.

Bir sözlə, iOS üçün proqramlar hazırlayanlar 2008-2020-ci illər arasında cəmi 200 milyard dollar, təkcə 2021-ci ildə 60 milyard dollar gəlir əldə ediblər. Bu vəziyyət əldə olunan gəlirin illər ərzində nə qədər artdığını da ortaya qoyur.

Verilən məlumata görə, iOS tərtibatçıları 2020-ci ildə App Store-dan 45 milyard dollar gəlir əldə ediblər. 2020-ci illə müqayisədə 2021-ci ildə proqram tərtibatçılarının App Store-dan əldə etdiyi gəlirlərdə təxminən 34 faiz artım olduğunu görürük. Tərtibatçıların indiyə qədər qazandıqları 260 milyard dolların yarısından çoxu təkcə son üç ildə əldə edilib.

Əvvəllər komissiya ilə bağlı tərtibatçılarla ciddi problemlər yaşayan Apple, App Store-da daha aşağı komissiyalar təklif edən Kiçik Biznes Proqramı ilə gündəmə gəlir. Bu proqram illik gəliri 1 milyon dollara qədər olan tərtibatçılar üçün komissiya dərəcəsini 30 faizdən 15 faizə endirib. Gəlirlərin artmasının ən əhəmiyyətli səbəbi Kiçik Biznes Proqramı ilə azaldılmış komissiya dərəcəsi ola bilər.

Apple iOS tərtibatçıları üçün yüksək gəlirin arxasında duran ən böyük amillərdən biri daha aşağı tərtibatçı komissiya dərəcəsi, eləcə də Apple-ın tərtibatçılara daha cəlbedici tətbiq təcrübəsi yaratmağa kömək etmək və yüksək proqram təminatı istehsal etməyi asanlaşdırmaq üçün tərtibatçılara təklif etdiyi yeni alətlər və texnologiyaların inkişafıdır.  

Onlardan biri - Xcode Cloud, güclü bulud xidmətlərindən istifadə edərək proqramların istehsalı, sınaqdan keçirilməsi və yerləşdirilməsi üçün lazım olan çoxsaylı tapşırıqları və alətləri bir araya gətirir ki, fərdi tərtibatçılar və komandalar daha məhsuldar ola və istifadəçilərinə gözəl proqramlar təqdim edə bilsinlər.

"Tətbiqdaxili Tədbirlər və Xüsusi Məhsul Səhifələri" ilə App Store tərtibatçılara tətbiqlərini tanıtmaq və istifadəçilərlə əlaqə yaratmaq üçün yeni yollar təqdim edir.