Avstraliyanın ən böyük banklarından biri olan "Westpac", ölən müştərilərdən xidmət haqlarının tutulması da daxil olmaqla, 10 ildən çox qanunsuz fəaliyyətlərinə görə 80 milyon dollardan çox cərimə ödəyəcək.

Marja.az xəbər verir ki, bu barədə çərşənbə axşamı Avstraliyanın Qiymətli Kağızlar və İnvestisiyalar üzrə Dövlət Komissiyası (ASIC) məlumat yayıb.

Tənzimləyicinin mətbuat xidmətinin yaydığı açıqlamada bildirilir ki, Komissiya ölkənin ən böyük maliyyə-kredit təşkilatlarından birində - Westpac-da aşdırma aparıb. Məlum olub ki, bank tərəfindən yol verilmiş qanun pozuntuları bank, konsaltinq və sığorta xidmətləri alan istehlakçılara, eləcə də pensiya əmanətlərini banka etibar edənlərə böyük ziyan vurur.

Maliyyə tənzimləyicisi tərəfindən bankın fəaliyyətində aşkar edilən qanun pozuntuları arasında vəfat etmiş müştərilərə xidmət haqqı, sığorta polisləri ilə dələduzluq, qanunsuz komissiyaların yığılması, ödənişlər və tariflər barədə məlumatların müştərilərdən gizlədilməsi də var. 

ASIC müəyyən edib ki, son on il ərzində bank tərəfindən müntəzəm pozuntular səbəbindən ən azı 67 min müştəri zərər çəkib. “Westpac və əlaqəli təşkilatlar 11 min müştərinin ölümündən sonra onlara göstərilən xidmətlərə görə 10 milyon Avstraliya dollarından çox (7,1 milyon ABŞ dolları) alıblar. Bankın ən azı 7 min müştərisi eyni sığorta polisi üçün bir neçə dəfə ödəniş edib.

Bundan əlavə, komissiya Westpac-ı mütəmadi olaraq tarifləri ilə bağlı bütün məlumatları müştərilərdən gizlətməkdə günahlandırıb.  Bank  qeyri-qanuni tariflər ilə müştərilərdən 12 milyon Avstraliya dolları (8,5 milyon ABŞ dolları) qazanıb. Sahiblərinin xəbəri olmadan gizli ödənişlər vasitəsilə 4,9 milyon ABŞ dolları hesablardan silinmişdir. Bu pozuntular 33 mindən çox insanın maraqlarına toxunub.

Westpac administrasiyası tənzimləyici tərəfindən müəyyən edilmiş bütün pozuntuları etiraf edib və 113 milyon Avstraliya dolları (80,6 milyon ABŞ dolları) məbləğində cərimə ödəməyə razı olub, bunun təxminən 80 milyon dolları (57 milyon ABŞ dolları) bankın müştərilərinə ziyana görə kompensasiya olaraq ödəniləcək.

Westpac 1817-ci ildə əsası qoyulmuş Avstraliyanın ən qədim bank təşkilatıdır.