Bloomberg, danışıqlarda iştirak edən bir neçə diplomata və sənaye insayderlərinə istinadən xəbər verir ki, Birləşmiş Ştatlar OPEC+a təzyiq etmək və 23 ölkədən ibarət kartelə neft hasilatını daha da artırmağa məcbur etmək üçün son illərin ən güclü koalisiyasını toplayıb.

Marja xəbər verir ki, məlumata görə, Çin, Yaponiya və Hindistan da daxil olmaqla ən böyük neft istehlakçıları, mərkəzi bankları təşviqlərdən və sıfır dərəcə siyasətindən imtina etməyə məcbur edən enerji inflyasiyasının sürətlənməsi fonunda bağlı qapılar arxasında diplomatik kampaniya aparırlar.

Bloomberg-in mənbələri bildirirlər ki, Co Bayden (Joe Biden) administrasiyası son 7 ilin ən yüksək səviyyəsinə çatan benzin qiymətlərindəki artımdan getdikcə daha çox narahat olur və OPEC+u həftələrdir daha çox neft hasil etməyə çağırır. 

Dünyanın dördüncü ən böyük neft istehlakçısı olan Yaponiya oktyabrın sonunda bu çağırışlara qoşulmaq üçün nadir addım atıb. Üçüncü ən böyük istehlakçı olan Hindistan da daha çox hasilat tələb edir. Diplomatların fikrincə, Çin üzdə susur, ancaq gizlində hasilatın artırılmasını istəyir.

ABŞ-ın yüksək səviyyəli enerji diplomatı Amos Hochstein "Biz enerji böhranı içərisindəyik" deyib: “İstehsalçılar neft və qaz bazarlarının tarazlığını təmin etməlidirlər”.

İndi hər ay OPEC+ ölkələri hasilatı sutkada 400 min barel artırırlar. Lakin bu kifayət deyil. Romada yüksək rütbəli ABŞ rəsmisi Bloomberg-ə bildirib ki, ABŞ enerji istehlak edən digər ölkələrlə OPEC+u cari tədarük böhranının öhdəsindən gəlməyə necə sövq etmək barədə danışıqlar aparır.

Onun sözlərinə görə, noyabrın 4-də keçiriləcək növbəti görüşdə Səudiyyə Ərəbistanı və Rusiyanın iştirakı ilə kartelin heç bir tədbir görməyəcəyi təqdirdə cavab tədbirləri paketi müzakirə edilir.

Brent markalı neftin qiyməti kəsir fonunda bir barel üçün 130% artaraq 36 dollardan 83 dollaradək yüksəlib. "Goldman Sachs"ın məlumatına görə, oktyabr ayında dünya anbarları sutkada 4,5 milyon barel sürətlə boşalıb və ilin sonunda cəmi ehtiyatlar son 8 ilin ən aşağı hsəviyyəsində ola bilər.