Azərbaycan Banklar Assosiasiyası (ASA) və Qarabağ Dirçəliş Fondu arasında işğaldan azad edilmiş ərazilərin bərpası və yenidən qurulması, dayanıqlı iqtisadiyyata və yüksək rifaha malik regiona çevrilməsi istiqamətində həyata keçirilən tədbirlərə dəstək göstərilməsi sahəsində əməkdaşlığa dair Memorandum imzalanıb.

ASA-nın yaydığı məlumata görə, Memorandumu Azərbaycan Banklar Assosiasiyasının Rəyasət Heyətinin sədri Zakir Nuriyev və Qarabağ Dirçəliş Fondunun İdarə Heyətinin sədri Rəhman Hacıyev imzalayıblar.

Əməkdaşlıq Memorandumunun məqsədi işğaldan azad edilmiş ərazilərin bərpası və yenidən qurulması, dayanıqlı iqtisadiyyata və yüksək rifaha malik regiona çevrilməsi istiqamətində həyata keçirilən tədbirlərə dəstək göstərilməsi sahəsində əməkdaşlığın həyata keçirilməsini, eyni zamanda mümkün olduğu halda bankların xidmət şəbəkəsi, məhsulları və digər resurslarının səfərbər olunması vasitəsi ilə QDF-ə köçürülən ianələrin artımını təşviq etməkdir.

Razılaşmaya əsasən, yuxarıda qeyd olunan məqsədlərə nail olmaq üçün Memorandumda QDF və ABA-nın üzvləri arasında əməkdaşlıq mühitinin və kommunikasiyasının yaradılması, mövcud işçi qruplarının təlimatlandırılması ilə yanaşı ehtiyac olduğu təqdirdə yeni işçi qruplarının yaradılması, QDF-in işçi qruplarının iclaslarında iştirakının təmin edilməsi, Fond tərəfindən təqdim edilən layihələrin ABA üzvlərinə kommunikasiya edilməsinin təşkili, maliyyələşdirilməsi imkanlarının təhlili və araşdırılması kimi məsələlər öz əksini tapıb.

Bu əməkdaşlıq eyni zamanda işğaldan azad edilən ərazilərə qayıdacaq vətəndaşlarımızın güzəştli bank xidmətləri, eləcə də həmin ərazilərdə fəaliyyət göstərəcək şirkətlərin güzəştli bank xidmətləri ilə təmin edilməsi imkanlarının araşdırılması kimi əhəmiyyətli mövzuları da əhatə edir.

Tərəflər bu əməkdaşlığın işğaldan azad edilən ərazilərin bərpası, yenidənqurulması, sosial-iqtisadi rifahının yaxşılaşdırılması istiqamətində görülən işlərdə əhəmiyyətli rol oynayacağını ifadə ediblər.

Xatırladaq ki, Azərbaycan Banklar Assosiasiyasının (ABA) üzvləri şanlı qələbəyə aparan 44 günlük müharibə zamanı xalqımızın və dövlətimizin yanında olmağa, ümumi məqsədlərimizə çatmağa töhfə verməyə çalışmışlar.  Belə ki, Silahlı Qüvvələrə Yardım Fonduna banklar və qruplar tərəfindən köçürmələr 5.7 milyon  manat təşkil etmişdir.

ABA üzv təşkilatları Azərbaycan Respublikası Prezidentinin tapşırıqları və Mərkəzi Bankın tövsiyəsi ilə hərbçilərimizin və düşmən təxribatı nəticəsində zərər dəymiş vətəndaşlarımızın dəstəklənməsi məqsədilə birgə bəyanatla çıxış etmişlər. Bu bəyanatla yanaşı banklar da fərdi yanaşma əsasında şəhid ailələrinin, yaralı hərbçilərin və mülki şəxslərin öhdəliklərinin silinməsini təmin etmişlər.

Nəticədə banklar və bank olmayan kredit təşkilatları tərəfindən, o cümlədən bağlanmış bankların hesabına 1023 şəhidin ümumi məbləği 8 milyon manatdan çox 1745 krediti üzrə əsas və faiz borcu tamamilə silinmişdir. Həmçinin yaralı hərbçilərimizin faiz ödənişlərinin hesablanması dondurulmuş, şəhid ailələrinə və zərərçəkən mülki şəxslərə də geniş güzəştlər edilmişdir.

İndiyə qədər Qarabağ Dirçəliş Fonduna Banklar tərəfindən edilən ianələrin həcmi 2.55  milyon manat təşkil etməkdədir. “YAŞAT” Fondu ilə ABA arasında anlaşma Memorandumu imzalanmışdır ki, bu da bundan sonra bu dəstək tədbirlərinin davamlı və daha sistemli həyata keçirilməsinə töhfə verir. “YAŞAT” Fonduna isə ABA üzvləri tərəfindən köçürülən vəsaitin həcmi 2.9 milyon manat təşkil etmişdir.