NEQSOL Holding Davamçıların Hazırlanması və Karyera İdarəetmə sahəsində mükəmməlliyə görə nüfuzlu Brandon Hall Group Silver Award mükafatına layiq görülüb.

NEQSOL Holding-dən Marja-ya daxil olmuş məlumatda bildirilir ki, holdinq bu mükafata idarəetmə komandası üçün dəyərli, konstruktiv karyera inkişafı imkanlarını və strateji hədəflərinə çatması üçün zəruri istedadlarla təmin edən Davamçıların Hazırlanması Proqramına (Succession Readiness Program) görə layiq bilinib. Holdinqin mükafat qazanması 19 avqust 2021-ci il tarixində elan edilib.

“Brandon Hall Group HCM Excellence Awards” tədris və inkişaf, istedadların idarə edilməsi, liderliyin inkişafı, istedadların cəlbi, insan resursları, müxtəliflik, ədalətlilik və inklüzivlik, və gələcək fəaliyyət baxımından əldə edilmiş böyük nailiyyətlərə görə təqdim edilir.

Məlumatda qeyd edilib ki, NEQSOL Holding-in Davamçıların Hazırlanması Proqramı fərdi tələblərə cavab vermək və holdinqin şirkətləri arasında sinerji yaratmaq qabiliyyətinə görə dəyərləndirilib. Proqram holdinqin kadr ehtiyatları ilə bağlı planlarını qiymətləndirir, həmçinin fərdi inkişaf prosesləri vasitəsilə idarəetmə komandalarının inkişafını dəstəkləyir.

NEQSOL Holding-in Baş İcraçı Direktoru Yusif Cabbarov bildirib:

“Biznesimiz üçün çox əhəmiyyətli sahədə bu nüfuzlu mükafata layiq görüldüyümüzə görə məmnunuq. Biz, fəaliyyətimizin bütün istiqamətlərində mükəmməlliyi təşviq edirik, bizim məqsədimiz isə bütün şirkətlərimizə regional bazarlarda lider olmaqda dəstək göstərməkdir. İnsan kapitalı holdinqimizin əsas aktividir və istedadların idarə edilməsi biznes hədəflərimizə nail olmaq baxımından vacib əhəmiyyət kəsb edir. Səylərimizin beynəlxalq səviyyədə tanınması ilə qürur duyuruq”.

NEQSOL Holding-in İnsan Kapitalı üzrə Baş Direktoru Meriç Tunç bildirib:

“Brandon Hall Group Excellence Award mükafatına layiq görülmək çox xoşdur. Bu mükafat bizim istedadların və davamçıların idarə edilməsi fəaliyyətinə sadiqliyimizi əks etdirir və mükəmməlliyə doğru yolda uğurlarımızı möhkəmləndirməyə dəstək göstərir”.

“Brandon Hall Group” Əməliyyatlar üzrə Baş Direktoru və HCM Excellence Awards Proqramının rəhbəri Reyçel Kuk deyib:

“Brandon Hall Group Excellence Award 2021-ci ildə COVID-19 pandemiyası dövründə aidiyyəti tərəfləri dəstəkləmək üçün mümkün olan tədbirləri həyata keçirmiş şirkətlərin zəruri və layiqli tanınmasını təmin edir. Mükafatlar işəgötürənlər, əməkdaşlar və müştərilər üçün əvvəlki dövrlərlə müqayisədə indi daha da əhəmiyyətli olan insan kapitalının idarə edilməsi sahəsində ən qabaqcıl təcrübələri təsdiq edir”.

NEQSOL Holding-in fəaliyyətinin əsas istiqamətləri Böyük Britaniya, ABŞ, Türkiyə, Azərbaycan, Ukrayna, Gürcüstan, Qazaxıstan, Birləşmiş Ərəb Əmirlikləri və s. ölkələrdə enerji, telekommunikasiya, yüksək texnologiyalar və tikinti sahələrini əhatə edir.

Brandon Hall Group insan kapitalının idarə edilməsi sahəsində ən böyük və uzunmüddətli mükafatlandırma proqramını həyata keçirir. İnsan kapitalının idarə edilməsi sahəsində müstəqil təhlil və araşdırma şirkəti olan, Brandon Hall Group tədris və inkişaf, istedadların idarə edilməsi, liderliyin inkişafı, müxtəliflik, ədalətlilik və inklüzivlik, istedadların cəlbi, insan resurslarının və işçi qüvvəsinin idarə edilməsi sahələrində araşdırmalar aparır. Brandon Hall Group 28 ildən çox müddət ərzində dünya üzrə 10 mindən çox müştəriyə beynəlxalq səviyyəli araşdırmalar və məsləhətlər təqdim etməklə dəstək olmuşdur.