İngiltərədə yeni növ koronavirusun Delta variantının təsirilə Yanvar ayının sonundan bu yana ən yüksək günlük yoluxma sayı qeydə alınıb. Marja xəbər verir ki, pandemiyaya dair proseslər bazarlara mənfi təsir edir.

Delta variantının qlobal miqyasda yeni bir koronavirus dalğası yaratması ilə əlaqədar olaraq Asiyada səhmlərdə və ABŞ-da fyuçerslərdə satış dalğası yaşanıb.

MSCI Asiya Sakit okean indeksi altı gün sonra ilk dəfə mənfiyə düşüb.

Risk iştahının azalması ilə dollar bahalaşır. Bloomberg Dollar İndeksi müsbətdədir. İnkişaf etməkdə olan ölkələrin pul vahidlərinin əksəriyyəti dollara qarşı dəyər itirib. 

Analitiklərə görə, Delta variantının yayılması inflyasiyanın yüksəlməsini təhdid edə bilər. Analitiklər peyvəndləmənin irəlilədiyi inkişaf etmiş ölkələrdə Delta variantının iqtisadiyyata təsirinin məhdud olduğunu düşünsə də, aşağı peyvəndləmənin olduğu ölkələrdə iqtisadi toparlanmanın gecikməsinin söz mövzusu ola biləcəyini vurğulayırlar. 

OPEC+ Texniki Komitəsi proqnozlarını açıqlayıb

Neft təklifinin Avqust ayındakı həcmini müəyyən edəcək Cümə axşamı günkü yığıncaqdan əvvəl OPEC+ Texniki Komitəsi proqnozlarını ehtiva edən hesabat yayımlayıb. Hesabata görə, mövcud təklif səviyyəsinin davam etdirilməsi nəticəsində gündəlik istehsal, tələbi ödəməkdə qeyri-kafi qalacaq.

Hesabata görə, tələbin təklifi Avqust ayında gündəlik 1,7 milyon barrel, ilin ikinci yarısında isə 1,9 milyon barrel aşması gözlənilir.

OPEC+un cümə axşamı günü neft təklifinin (hasilatının) artırılması qərarı verəcəyi gözlənilsə də, miqdar bilinmir.

Bloomberg-in sorğusuna qatılan iqtisadçıların proqnozu istehsalda gündəlik təxminən 550 min barrel artım qərarı olacağı istiqamətindədir.

Neft qiymətləri isə OPEC+ yığıncağından əvvəl Delta variantının yaratdığı narahatlıqlar ilə əlaqədar olaraq düşüb. Bakı vaxtı ilə saat 09:44-də Brent nefti üzrə avqust kontraktı 0,3% ucuzlaşma ilə 74,48 dollardan ticarət olunub.