Təhsil Tələb Kredit Fondunun yaradılmasından sonra Maarifçi Tələbə Kredit Fondu bir müddət fəaliyyətini davam etdirəcək.

Marja xəbər verir ki, bunu təhsil naziri Emin Əmrullayev keçirdiyi mətbuat konfransında deyib.

Nazir qeyd edib ki, Maarifçi Tələbə Kredit Fondu pilot layihə idi:

"Bu Fonddun təsisçiləri ali təhsil müəssisələri idi və kreditlər həmin ali təhsil müəssisələrində təhsil alan tələbələrə verildi. Ən yaxşı halda bir neçə yüz tələbəyə kredit ayrılıb. Təhsil Tələb Kredit Fonduna isə dövlət vəsait ayırıb, büdcədən ayrılan 80 milyon manat müqayisəolunmaz bir məbləğdir. Biz bu vəsait ilə hər il on minlərlə tələbəni əhatə edəcəyik. Bu mənada həmin fondun dövlət tərəfindən maliyyələşdirilən və daha geniş formatından danışırıq. Maarifçi Tələbə Kredit Fondu dövlət büdcəsindən maliyyələşmirdi. Maarifçi Tələbə Kredit Fondu bir müddət fəaliyyətini davam etdirəcək, çünki kredit alan tələbələr var, bu proses başa çatmalıdır".

“Maarifçi" Tələbə Kredit Fondu Azərbaycan Respublikası Təhsil Nazirliyinin təşəbbüsü ilə Azərbaycan Respublikasının dövlət ali təhsil müəssisələri tərəfindən təsis edilmişdir. Azərbaycan Respublikası Ədliyyə Nazirliyində 14.10.2015 - ci il tarixində qeyri-hökumət təşkilatı kimi dövlət qeydiyyatına alınmışdır.

“Maarifçi Tələbə Kredit” Fondu tələbələr üçün yaradılmış fonddur. Fondun missiyası aztəminatlı ailələrdən olan tələbələrə kreditlərin verilməsi vasitəsi ilə onlara ali təhsil almaqda bərabər imkanların yaradılmasıdır.

Fəaliyyət istiqamətləri aşağıdakılardır:

Fond öz məqsədinə nail olmaq üçün işini iki istiqamət üzrə fəaliyyət göstərir:

- Aztəminatlı tələbələrə onların təhsil məsrəflərinin maliyyələşdirilməsinə dəstək olmaq üçün Azərbaycan Respublikasında fəaliyyət göstərən müvəkkil kredit təşkilatları tərəfindən güzəştli təhsil kreditlərinin verilməsini təşkil etmək;

- Aztəminatlı tələbələrə onların təhsil məsrəflərinin maliyyələşdirilməsinə dəstək olmaq üçün müxtəlif qurumlar və fiziki şəxslər tərəfindən qrantların verilməsini təşkil etmək.