Dünyanın 3-cü ən iri brilyantı tapılıb

Dünyanın 3-cü ən iri brilyantı tapılıb

Yenə Afrika, yenə Botsvana!

Afrikanın ən böyük brilyant istehsal edən ölkəsi olan Botsvana yeni rekorda yaxındır. Marja xəbər verir ki, brilyant hasilat şirkəti Debswana iki həftə öncə çıxardığı 1098 karat çəkisi olan qiymətli daşı ölkə prezidenti Mokgwetsi Masisi-yə təqdim edib.

Uzunluğu 73 mm, eni 52 mm, qalınlığı isə 27 mm olan nəhəng brilyant dünyanın indiyə qədər tapılmış üçüncü ən iri təbii brilyantı hesab oluna bilər. İndiyə qədər aşkar edilmiş ən iri təbii brilyant - 3106 karat olan Cullinan 1905-ci ildə Cənubi Afrikada, ikinci ən böyük brilyant - 1109 karatlıq Lesedi La Rona isə 2015-ci ildə elə Botsvananın özündə çıxarılıb.

“Bu, Debswana-nın 50 illik əməliyyat tarixində aşkar edilmiş ən böyük brilyantdır.” - şirkətin icraçı direktoru Linette Armstronq bildirib - “İlkin qiymətləndirməmiz hazırkı qiymətli daşın dünyanın üçüncü ən iri brilyantı olduğunu göstərir.”

Debswana hökumət və dünyanın brilyant nəhəngi De Beers arasında yaradılmış birgə müəssisədir və satışlardan əldə olunan gəlirin 80%-ə qədəri dividend, royalti və vergilər şəklində dövlət büdcəsinə gedir. Şirkət yeni tapılmış brilyanta hələ ad verilmədiyini və satışı barədə yekun qərar olmadığını bildirib.