Xanımlar üçün gündəlik həyatın vazkeçilməzlərindən biri də kosmetikadır. Marja xəbər verir ki, hazırda qlobal kosmetika bazarının həcmi təxminən 390 milyard dollardır ki, bu rəqəmin 2027-ci ildə 463 milyard dollara çatacağı gözlənilir.

Əksər xanımların üstünlük verdiyi vasitələr daha qalıcı, maksimum təbii görünüş verən, gec xarab olan kosmetik məhsullardır. Amma... kosmetika şirkətləri bu xüsusiyyətləri təmin etmək üçün məhsulun tərkibinə yüksək toksik kimyəvi elementlər qatır və bu barədə etiketdə heç bir kəlmə də yazmır.

ABŞ, Kanada, İsveçrə, Çin və başqa ölkələrdən 15-ə yaxın alimin 2016-2020-ci illər ərzində 231 kosmetik məhsul üzərində apardığı analizlər həmin məhsulların 55%-ə qədərinin tərkibində yüksək toksik kimyəvi birləşmələr - PFAS (per və poliftoralkalinli və fluorinli maddələr) olduğunu üzə çıxarıb. Bu məhsulların cəmi 8%-nin üzərində həmin elementlərdən istifadə barəsində qeyd var, qalan 92%-i isə məhsulun təmiz, kimyəvi qatqısız və ziyansız olduğunu iddia edir.  

PFAS suya davamlılığına görə qablaşdırma sənayesindən tutmuş kosmetikaya və yanğınsöndürməyə qədər bir çox sahədə geniş istifadə olunur. Lakin kifayət qədər toksikdir və ətraf mühitə parçalanmır. Environmental Science&Technology Letters jurnalında dərc olunan tədqiqat nəticələri göstərib ki, tonal kremlər (63%), tuşlar (47%), göz üçün məhsullar (58%) və dodaq boyaları (55%) tərkibində ən çox fluorin olan məhsullar sırasındadır. Bu maddə isə həm dəriyə, həm də göz qişasına nüfuz edərək, orqanizmdə ciddi fəsadlar yarada bilər.

Qərb ölkələri artıq bununla bağlı ciddi əməli addımlar atmaqdadır. Təsadüfi deyil ki, dünən - iyunun 15-də ABŞ Konqresində “Kosmetika məhsullarında PFAS-a yox” adlı yeni qanun layihəsi təqdim olunub. Lakin aldığı məhsulun kimyəvi tərkibini bilməyən xanımların çoxu bu təhlükədən hələ də xəbərsizdir...