Mask yeni Tvit atdı, Bitkoin bahalaşdı

Mask yeni Tvit atdı, Bitkoin bahalaşdı

Ən böyük kriptovalyuta 39 min dollara yaxınlaşıb.

Dünyanın 1 nömrəli kriptovalyutası Bitkoin (Bitcoin) dünən axşam 10%-dən çox bahalaşıb.

Marja CoinDesk-ə istinadla xəbər verir ki, Bitkoinin dəyəri sürətlə yüksələrək, 38,903 dollar təşkil edib. Əsas səbəb qalmaqallı Tesla rəhbəri, hər çıxışı ilə kriptovalyuta qiymətlərində təlatüm yaradan Elon Maskın yeni Tviti olub.

Mask Tvitter hesabında Cointelegraph səhifəsinin onun kriptovalyuta qiymətlərində manipulyasiya etməsi barədə tənqidlərə belə cavab verib: “Bu doğru deyil. Tesla öz Bitkoin aktivlərinin cəmi 10%-ni satıb. Kriptomaynerlərin ağlabatan (50%) təmiz enerjidən istifadə etməsi və müsbət gələcək tendensiya təsdiqlənsə, Tesla Bitkoinlə sövdələşmələri davam etdirəcək.”

Xatırladaq ki, ötən ildən bəri 300%-dən çox bahalaşan ən dəbli kriptovalyuta bu il aprelin ortalarında tarixi rekorda - 65 min dollara çatmışdı. Daha sonra sürətlə dəyər itirən bitkoin son bir ayda təxminən 40% ucuzlaşıb. Mayın 12-də Elon Mask ekoloji amilləri (həddən artıq enerji istifadəsini) əsas gətirərək, Bitkoindən ödəniş vasitəsi kimi istifadəni dayandırdıqlarını açıqlamışdı. Elə həmin gün Bitkoin kəskin ucuzlaşmış, kriptovalyuta bazarı daha 300 milyard dollar dəyər itirmişdi.