G-20 ölkələrinin ÜDM-i pandemiyadan əvvəki səviyyəyə qayıdır

G-20 ölkələrinin ÜDM-i pandemiyadan əvvəki səviyyəyə qayıdır

Artım 0,8% təşkil edib, Çin hamını qabaqlayıb.

G-20 ölkələrinin ÜDM-i pandemiyadan əvvəki səviyyəyə qayıdır

Özündə ABŞ, Kanada, Almaniya, Fransa, Böyük Britaniya, Yaponiya, Cənubi Koreya kimi iqtisadi nəhənglər də daxil olmaqla 37 ölkəni birləşdirən İqtisadi Əməkdaşlıq və İnkişaf Təşkilatı (OECD) bugün G20 ölkələr qrupunun cari ilin birinci rübünə dair ÜDM göstəricilərini açıqlayıb.

Marja xəbər verir ki, ÜDM artımı 2020-ci ilin son rübü ilə müqayisədə 0,8%, ötən ilin müvafiq dövrünə nisbətən isə 3,4% təşkil edib.

Nəticələr G20 ölkələrinin ÜDM-nin pandemiyadan öncəki səviyyəyə qayıtdığını göstərir. Çin ən yüksək illik artım (18,3%) göstərdiyi halda, Böyük Britaniya iqtisadiyyatının həcmi ən çox kiçilən ölkə olub (-6,1%).

Hindistan, Türkiyə və Çin ÜDM səviyyələrini pandemiyadan əvvəlki dövrə qaytara bilən ilk ölkələr sırasındadır. Artıq 2021-ci ilin birinci rübündə bu nəticəni əldə edən üçlükdə ÜDM artımı müvafiq olaraq 2,1%, 1,7% və 0,6% təşkil edib. Əlavə olaraq, Avstraliya (1,8%), Cənubi Koreya (1,7%) və Braziliya (1,2%) da birinci rübdə pandemiyadan əvvəlki inkişaf səviyyəsinə qayıdıblar.

Qalanları isə hələ yerində sayır...

ABŞ (1,6%) və İtaliyada (0,1%) artım sürətlənsə də, nə onlar, nə də ÜDM artımının yenidən zəiflədiyi İndoneziya (1,6%), Kanada (1,4%), Cənubi Afrika (1,1%) və Meksika (0,8%) hələ pandemiyadan əvvəlki səviyyəyə qayıda bilməyiblər. Almaniya (-1,8%), Böyük Britaniya (-1,5%), Yaponiya (-1%) və Səudiyyə Ərəbistanında (-0,1%) əksinə, azalma baş verib.