"10 dakikaya Bi mutluluk Getir - içində də 7,5 milyard dollar olsun"

Türk ərzaq kuryeri bazar dəyərini üçqat artırıb.

"10 dakikaya Bi mutluluk Getir - içində də 7,5 milyard dollar olsun"

Baş ofisi İstanbulda yerləşən ərzaq çatdırılma tətbiqi, cəmi 7 ildir fəaliyyət göstərən "Getir" dünən investorlardan 550 milyon dollar vəsait cəlb edib.

Marja xəbər verir ki, hazırda Türkiyənin 30 şəhərində 500-dən artıq “kölgə”mağazası, Londonda yenicə açılmış 28 çatdırılma mərkəzi olan və bu ay Amsterdam, Paris və Berlinə doğru genişlənməyi hədəfləyən şirkət bununla da, bazar dəyərini üçqat artıraraq, 7 milyard 555 milyon dollara çatdırıb.

Hazırkı maliyyələşmə ilə birlikdə "Getir" son 4 ayda investorlardan 1 milyard dollardan artıq vəsait cəlb edib. Əvvəki dəstəkləyiciləri "Tiger Global" və "Sequoia Capital" olan şirkətin yeni investorları siyahısına 875 milyard dollarlıq aktivlərə malik Əbu-Dabi Rifah Fondunun törəmələri - "DisruptAD" və "Mubadala Investment Company", eləcə də Silikon Vadisindən "Silver Lake" fondu qoşulub.

Şirkətin hədəfi maksimum əhatəli mağazalar şəbəkəsi vasitəsilə 1500 adda məhsulun içərisindən istənilən sifarişi pizza sifarişlərində olduğu kimi, 10 dəqiqə ərzində müştəriyə çatdırmaqdır. “Öncədən planlanmış çatdırılmalar BlackBerry-dir. Biz isə Apple-ıq.” - şirkətin qurucusu və baş direktoru Nazım Salur bildirir.

"Getir" hazırkı bazar dəyəri ilə Avropanın Deliveroo və Grubhub kimi çatdırılma xidmətlərini, eləcə də Böyük Britaniyanın WM Morrison və Marks and Spencer kimi iri supermarket şəbəkələrini üstələyir.

"Getir" qurucusu Nazım Salur, "Getirin bu dəyərə çatması 10 dəqiqədə təslimat kimi orijinal bir fikirin texnologiya ilə əlaqələndirildikdə dünyada necə bir maraq oyandırdığını göstərir. Bu əslində Türkiyədən də yeni texnoloji iş modellərinin çıxa biləcəyinin də göstəricisidir. Yeni vəsait ilə həm Türkiyədəki işlərimizi daha sürətli böyütməyə, həm də yeni ölkələrdə bu iki hecalı Türkcə sözü sevdirməyə davam edəcəyik", - deyib.

04.06.2021 12:16

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az