Azərbaycanda dövlət dəstəyi ilə aqrar sığorta mexanizminin tətbiqi prosesində növbəti mühüm addım atılıb. İlk dəfə olaraq ölkədə müstəqil aqrar sığorta ekspertləri fəaliyyətə başlayırlar.

Aqrar Sığorta Fondunun yaydığı məlumata görə, Azərbaycanda Türkiyənin TARSİM sisteminin təcrübəsindən yararlanaraq yaradılan aqrar sığorta mexanizmində müstəqil aqrar sığorta ekspertləri mühüm vəzifəni yerinə yetirir.

Ekspertlər sığortalanma zamanı təsərrüfatın vəziyyətini müəyyən edir və sığorta risklərini qiymətləndirirlər. Sığorta hadisəsi baş verdikdə isə hadisənin araşdırılması və dəyən zərərin hesablanması da müstəqil sığorta ekspertlərinin vəzifəsinə daxildir.

Nəticədə ilk dəfə olaraq sığorta  riskləri və sığorta hadisəsi zamanı dəyən zərər müstəqil mütəxəssislər tərəfindən qiymətləndiriləcək.

Müstəqil aqrar sığorta eksperti seçilmək üçün ölkədə fəaliyyət göstərən baytar, aqronom və digər əlaqəli ixtisasların sahibləri müraciət ediblər. Dövlət İmtahan Mərkəzinin təşkil etdiyi 2 test imtahanında uğurla iştirak edən və Aqrar Sığorta Fondunun təşkil etdiyi təlimlərdən keçən şəxslər müvafiq sertifikat alaraq fəaliyyətə başlayacaqlar. 

Hazırda 14 mütəxəssisin (9-u heyvandarlıq, 4-ü bitkiçilik) aqrar sığorta eksperti kimi fəaliyyətə başlaması nəzərdə tutulur. Gələcəkdə onların sayının artması və bütün ölkə ərazisini əhatə etməsi nəzərdə tutulur.

Aqrar Sığorta Fondunun İdarə Heyətinin sədri Fuad Sadıqov bildirib ki: «Müstəqil aqrar sığorta ekspertlərinin fəaliyyətə başlaması ölkənin bütün ərazisində aqrar sığorta sisteminin səmərəli tətbiqinə imkan verəcək. Bu isə öz növbəsində sığorta hadisələrinin sürətli və ədalətli tənzimlənməsinə, sığorta ödənişlərinin  operativ şəkildə həyata keçirilməsinə imkan verəcək».

Əksəriyyəti bölgələrdən olan müstəqil ekspertlər aqrar sığorta fəaliyyəti ilə yanaşı, öz iş yerlərində ənənəvi fəaliyyətlərini də davam etdirə biləcəklər.

Müstəqil aqrar sığorta eksperti xidməti ödənişlidir, belə ki, ekspertlərin həyata keçirdiyi xidmətlərə görə Aqrar Sığorta Fondu tərəfindən xidmət haqqı ödənilir. Bundan başqa, ekspertlərin təsərrüfatlara səfəri zamanı yol xərci də Fond tərəfindən qarşılanır. Başqa sözlə, ekspertin fəaliyyəti üçün fermerlər tərəfindən əlavə xərclər tələb olunmur.

Qeyd edək ki, Dövlət İmtahan Mərkəzi müstəqil aqrar sığorta eksperti sertifikatının alınması ilə bağlı növbəti imtahan elan edib. İmtahan may ayında keçiriləcək və müvafiq ixtisasların sahibləri imtahanda iştirak üçün müraciət edə bilərlər.   

Xatırladaq ki, Aqrar Sığorta Fondu Azərbaycan Prezidenti İlham Əliyevin 19 avqust 2019-cu il tarixli fərmanı ilə yaradılıb. 2020-ci ilin sonunda fəaliyyətə başlayan aqrra sığorta mexanizmi vasitəsilə heyvandarlıq (südlük inək və camışlar), 14 bitki növünü (arpa, buğda, çəltik, qarğıdalı, üzüm, çay, pambıq, portağal, naringi, limon, fındıq, şəkər çuğunduru və kartof) və akvakultura (balıqçılıq) məhsullarını sığortalamaq mümkündür.